كەمەروۆوداعى  «زيمنيايا ۆيشنيا» ساۋدا ۇيىندە شىققان ورتتە بارلىق وتباسى مۇشەلەرىنەن ايىرىلعان بالاعا پسيحولوگ پەن جاقىندارى اتا-اناسى، قارىنداسى مەن اجەسى قازا بولعانىن ەستىرتتى، دەپ حابارلايدى Qamshy.kz اقپارات اگەنتتىگى. 

ولار بالاعا قايعىلى جاڭالىقتى ەستىرە الماي ءبىراز قينالعان.  ماسكەۋدىڭ باس جاسوسپىرىمدەر پسيحياترى اننا پورتنوۆانىڭ ايتۋىنشا، بالانىڭ تۋىستارى مەن پسيحولوگتار بالامەن سويلەسۋدىڭ وڭتايلى ءادىسىن تاڭدادى.

11 جاستاعى سەرگەي وتباسىنان ايىرىلعانىن ەستىگەندە جىلاعان، ءبىراق بىردەن ەسىن جيىپ، ەندى كىممەن تۇراتىنىن سۇراعان.

ايتا كەتەيىك، «زيمنيايا ۆيشنيا» ساۋدا ۇيىندە شىققان ورتتە تەرەزەدەن سەكىرگەن ءجاسوسپىرىمنىڭ بارلىق وتباسى مۇشەلەرى ورتتە كوز جۇمدى. 11 جاستاعى سەرگەيدىڭ اتا-اناسى، اجەسى مەن قارىنداسى قازا بولدى.  جەرگىلىكتى  باق-تىڭ مالىمەتىنشە، ولار ساۋدا ورتالىعىنا بالالاردىڭ بىرىنە باس كيىم الۋعا بارعان. بالالارعا ارنالعان الاڭقايدا ءورت باستالعاندا ەشقايسىسى شىعاتىن ەسىكتى تابا الماعان. اكەسى سەرگەيدى 4-قاباتتان يتەرگەن، قالعانى سەكىرىپ ۇلگەرمەگەن.