قازاقستان رەسپۋبليكاسىنىڭ توتەنشە جانە وكىلەتتى ەلشىسى كارىم كوكىرەكبايەۆ 30 ناۋرىزدا قىرعىز رەسپۋبليكاسىنىڭ پرەزيدەنتى سوورونباي جەەەنبەكوۆكە سەنىم گراموتاسىن تاپسىردى، دەپ حابارلايدى Qamshy.kz اقپارات اگەنتتىگى ق ر ءسىم باسپا ءسوز قىزمەتىنە سىلتەمە جاساي وتىرىپ.

سالتاناتتى ءراسىم بارىسىندا قىرعىز رەسپۋبليكاسىنىڭ پرەزيدەنتى ەلشىنى ديپلوماتيالىق قىزمەتىنىڭ رەسمي باستالۋىمەن قۇتتىقتاپ، بۇل قۇرمەتتى ميسسيا ءبىزدىڭ ەلدەرىمىز اراسىنداعى باۋىرلاستىق، تاتۋ كورشىلىك جانە ءوزارا ءتيىمدى قاتىناستاردىڭ ودان ءارى دامۋىنا ىقپال ەتەتىنىنە سەنىمدىلىك ءبىلدىردى. قىرعىز رەسپۋبليكاسىنىڭ پرەزيدەنتى ءوزىنىڭ قىسقا ۋاقىت ىشىندە قازاقستاننىڭ ەلورداسى استانادا رەسمي ساپارمەن جانە ورتالىق ازيا مەملەكەتتەرى باسشىلارىنىڭ كەزدەسۋىندە ەكى رەت بولعانىن اتاپ ءوتتى.

«بۇل ساپارلار كەزىندە ماڭىزدى قۇجاتتارعا قول قويىلىپ، وزەكتى ماسەلەلەر تالقىلاندى. ءسىزدىڭ قىرعىزستانعا ەلشى بولىپ تاعايىندالۋىڭىزعا وتە قۋانىشتىمىن، ءارى ءبىزدىڭ قارىم-قاتىناستارىمىز كەلەشەكتە تەرەڭدەي تۇسەدى دەپ سەنەمىن، ويتكەنى قىرعىزدار مەن قازاقتار سياقتى بىر-بىرىنە جاقىن حالىق جوق»، - دەدى پرەزيدەنت س. جەەەنبەكوۆ.

ءوز تاراپىنان ك. كوكىرەكبايەۆ مادەني-گۋمانيتارلىق جانە ەكونوميكالىق سالالاردا ەكى حالىقتىڭ ىنتىماقتاستىعىن نىعايتۋعا بەرىلگەن مۇمكىندىك ءۇشىن العىسىن ءبىلدىردى. ول ەكى باۋىرلاس حالىقتار اراسىندا قالىپتاسقان سەنىمدى ديالوگ قوماقتى شارتتىق-قۇقىقتىق بازامەن جانە قىرعىزستان پرەزيدەنتى س.جەەنبەكوۆتىڭ قازاقستانعا رەسمي ساپارى شەڭبەرىندە قول قويىلعان تاريحي قۇجاتتار: قازاقستاندىق-قىرعىز مەملەكەتتىك شەكاراسىن دەماركاسيالاۋ تۋرالى شارتپەن جانە شەكارا رەجىمى تۋرالى كەلىسىممەن ايقىندالاتىنىن اتاپ كورسەتتى.