كوكپەكتى اۋدانىنىڭ سامار اۋىلىندا قۇتقارۋشىلار جاعالاۋعا جاقىن ماڭدا تۇراتىن تۇرعىنداردى ءقاۋىپسىز جەرگە كوشىرىپ جاتىر، دەپ حابارلايدى Qamshy.kz اقپارات اگەنتتىگى شقو توتەنشە جاعدايلار دەپارتامەنتىنە سىلتەمە جاساپ.

سۋ دەڭگەيىنىڭ كوتەرىلۋى تاسقىن ءقاۋپىن تۋىنداتتى. قۇتقارۋشىلار ساماردىڭ جاعالاۋ ماڭىنداعى تۇرعىندارىن كوشىرىپ جاتىر. كوكپەكتى اۋداندىق توتەنشە جاعدايلار ءبولىمى باستىعىنىڭ سوزىنە قاراعاندا، شامامەن 90 ءۇيدىڭ 200 تۇرعىنىن ەۆاكۋاسيالاۋ قاجەت. الايدا تۇرعىنداردىڭ باسىم كوپشىلىگى بۇدان باس تارتىپ وتىر.

تۇرعىندار مەكتەپ جانە اگرارلىق كوللەدج بازاسىنداعى ەكى ەۆاكۋاسيا بەكەتىنە ورنالاستىرىلادى.

«وسكەمەن-سامار» اۆتوجولىنىڭ 132-كيلومەترىندە ەرىگەن قار سۋى تاسىپ، 50 مەتردەي جەردى باسقان. تجد، جەرگىلىكتى بيلىك جانە پوليسيا وقيعا ورنىندا جۇمىس ىستەپ جاتىر.

ايتا كەتەيىك، سينوپتيكتەر شقو-دا الداعى كۇندەرى كۇن جىلى بولاتىندىعىن، جاۋىن-شاشىنعا بايلانىستى سۋ دەڭگەيىنىڭ كوتەرىلۋ ءقاۋپى بار ەكەنىن ەسكەرتەدى. شقو تجد داعدارىس ورتالىعىندا جەدەل شتاب، سونداي-اق شۇعىل جەلىنىڭ 55-38-19 ءنومىرى جۇمىس ىستەپ تۇر.