قازاقستان شۆەيسارلىق بانكتە جاتقان ءبىر ميلليون دوللاردان استام ەلدەن زاڭسىز شىعارىلعان قاراجاتتى تاركىلەۋ بويىنشا قاجەتتى ءىس-شارالاردى قولعا الدى، دەپ حابارلايدى Qamshy.kz اقپارات اگەنتتىگى باس پروكۋراتۋرانىڭ باسپا ءسوز قىزمەتىنە سىلتەمە جاساي وتىرىپ. بۇل قاراجاتتى حالىقارالىق ىزدەۋدە جۇرگەن ماعزۇم ابدارلييەۆ شەتەلگە شىعارعان.

باس پروكۋراتۋرا قىلمىستىق جولمەن كەلگەن جانە ەلدەن تىسقارى جەرگە زاڭسىز شىعارىلعان مۇلىكتى قايتارۋ بويىنشا جۇمىس ناتيجەسىندە «RothschildBankZurich» شۆەيسارلىق بانكتەن 1،3 ميلليوننان استام اقش دوللارى كولەمىندەگى اقشالاي قاراجاتتى انىقتادى. 

بەلگىلى بولعانداي، اقشا ماعزۇم ابدرالييەۆكە تيەسىلى، ول 2012 جىلدان باستاپ حالىقارالىق ىزدەۋدە ءجۇر. ابدرالييەۆ «قورعاس ءىسى» بويىنشا قىلمىستىق توپتىڭ مۇشەلەرى جاقايەۆقا، ءابدىراحمانوۆقا جانە قۇرمانالييەۆكە شەت ەلدە  قاراجاتتى زاڭداستىرۋعا كومەكتەسكەنى ءۇشىن كۇدىكتى بولدى.

«وسىعان بايلانىستى، پروكۋرور شۆەيسارلىق بانكتەگى اقشالاي قاراجاتتى تاركىلەۋ تۋرالى ءوتىنىشحاتتى سوتقا جولدادى. بيىلعى جىلدىڭ 29 ناۋرىزىندا الماتى قالاسىنىڭ المالى اۋداندىق سوتى پروكۋروردىڭ ءوتىنىشىن قاناعاتتاندىردى»، — دەلىنگەن حابارلامادا. 

ودان باسقا، اتالعان قىلمىستىق ءىس بويىنشا سوتقا دەيىنگى تەرگەپ-تەكسەرۋ بارىسىندا «تات كرەديت»  جشس-نىڭ كەڭسەسىن ءتىنتۋ كەزىندە ابدرالييەۆكە تيەسىلى 762 مىڭ اقش دوللارى جانە 915 مىڭ تەڭگە تابىلدى. پروكۋراتۋرا قاراجاتتى تاركىلەۋ ءۇشىن سوتقا ءتيىستى ءوتىنىش جولدادى.

ناتيجەسىندە پروكۋراتۋرا ورگاندارىنىڭ باستاماسى بويىنشا 2،1 ميلليوننان استام اقش دوللارى مەملەكەتتىڭ پايداسىنا تاركىلەندى.

باسپا ءسوز قىزمەتى اتاپ وتكەندەي، قىلمىستىق-پروسەستىك زاڭناماعا وزگەرىستەردىڭ ەنگىزىلۋىنە بايلانىستى بيىلدان باستاپ ۇكىم شىققانعا دەيىن زاڭسىز جولمەن الىنعان مۇلىك تاركىلەۋگە جاتادى.