شىنىندا، اقتوبەگە قوبالجىپ بارىپ ەدىم، قويان قۋعانداي، قۋانىپ قايتتىم. قوبالجىعانىم، «اپىرماي، كەشىم قالاي وتەدى ەكەن؟ كورەرمەندەر از جينالىپ قالسا شە؟» دەگەن جىبىرلاۋىق سۇراقتار سانامدا «سىرعاناق تەۋىپ» ءجۇردى. ونى جاسىرمايمىن. 

حوش، سونىمەن كۇلكى كۇنى اقتوبەدەگى ونەر ورتالىعىندا الپىس جىلدىعىما بايلانىستى شىعارماشىلىق كەشىمە جينالعانداردا ەسەپ بولمادى. قۋانعانىم سونشالىق، قۇلاعىمدى قاسي بەرىپپىن. ونىڭ ۇستىنە، كۇلكى كەشى جاڭا فورماتتا ءوتتى، ياعني مەن ساحنا تورىندە بازبىرەۋلەردەي تاناۋىمدى كوتەرىپ وتىرعان جوقپىن، كورەرمەندەرىمنىڭ اراسىندا ارقا–جارقا بولىپ وتىردىم. ەڭ سوڭىندا عانا تىلەك ايتۋىم ءۇشىن ساحناعا شاقىردى. مەنىڭ تۋىلعان كۇنىمنەن باستاپ، لاڭگى تەۋىپ جۇرگەن بالا مۇحتاردىڭ ءبىر كۇندىك ساتتەرى، ستۋدەنتتىك جىلدارداعى قىزىقتى وقيعالار، تاعى سوندايلار كەش اياقتالعانشا قىسقا، ءارى نۇسقا كۇيىندە ساحنالانىپ، ودان كەيىن عانا ساتيرالارىم ورىندالىپ جاتتى. «ەكى ەزۋ» تەاترىنىڭ ارتىستەرى بەكبول، بەرىك، گۇلزات، تاڭشولپاندار كورەرمەندەرىنىڭ ەكى ەزۋلەرىن جيدىرمادى. كەش «كۇلەيىكشى، مۇحتار–اي!» دەپ اتالدى.

ارينە، كەشتى ۇيىمداستىرۋشى «ەكى ەزۋ» ساتيرا تەاترىنىڭ ۇجىمىنا العىسىم شەكسىز! ونىڭ جەتەكشىسى، بەلگىلى ساتيريك، شاكىرتىم نۇرلىبەك جۇباتقان: «اعا، شىمكەنتتەن بۇرىن ءبىز تويلايىقشى؟» دەگەن ۇسىنىسى ۇيىقتاتپاعان ەدى، ەر جىگىتكە ءتان ۋادەسىندە تۇردى. اللانىڭ نۇرى جاۋسىن ىنىمە! وبلىس اكىمى بەردىبەك ساپاربايەۆتىڭ قولداۋى دا توبەمدى كوككە جەتكىزدى. الەۋمەتتىك جەلىدە «نەگە شىمكەنتتىكتەر شىرت ۇيقىدا جاتىر؟ الدە، ۇمىتىپ كەتكەن بە؟» دەپ جاناشىرلىقپەن جازىپ جاتقان وقىرماندارىما ايتارىم: «شىن ساتيريك نەمەسە اقىن بەلگىلى ءبىر اۋماقتىڭ عانا باسىبايلى جازۋشىسى بولمايدى. شىنايى جازۋشى رەسپۋبليكا جۇرتشىلىعىنا ورتاق. ونىڭ ۇستىنە مەن 1957 جىلى 12 جەلتوقساندا تۋىلعانمىن. قاقاعان قىستا. جىلدىڭ سوڭى. دەمەك، كەلەر جىلدان دا ۇلەسىم بار، جىل بويى تويلاۋىما سىزدەردەن رۇحسات.» الەۋمەتتىك جەلىدەگى «جەر ساتىلىپ جاتقاندا تويلاعانى نەسى؟» دەگەن سىقپىتتاعى وقىرمان جازبالارىنا دا كۇلە قارايمىن. جەردىڭ ساتىلۋىنا ءبىر كىسىدەي مەن دە قارسىمىن. ءبىراق ءومىر مۇنىمەن توقتاپ قالعان جوق قوي؟ ءجا، جارايدى، ءسوزدىڭ رەتى كەلىپ جاتقان سوڭ ايتىپ جاتقانىم عوي، مەنى جان–جاقتان قۇتتىقتاپ كەلۋشىلەر كوپ بولدى. قىرعىزستان رەسپۋبليكاسىنىڭ ءارتىسى ابدى كادىرماتوۆ (جونىشباي)، «تاماشا» ويىن- ساۋىق وتاۋىنىڭ تارلانى باقىت ايتوۆا حانىمنىڭ ارنايى قۇتتىقتاعاندارى جۇرەگىمدى جىلىتتى...