برازيليانىڭ ون شاقتى دەپۋتاتى ۇلتتىق كونگرەستىڭ جۇمىس پروسەسىندە ەسىمدەرىنە لۋلا دەگەن اتتى قوسۋدى تالاپ ەتتى. وسىلايشا باس بوستاندىعىنان ايىرىلعان ەلدىڭ ەكس-پرەزيدەنتى لۋيس يناسيۋ لۋلا دا سيلۆاعا قولداۋ كورسەتپەكشى.
بۇل باستاماعا قوسىلعان جۇمىسشىلار پارتياسىنىڭ باسشىسى گلەيزي حوففمانن ءوزىنىڭ تۆيتتەردەگى پاراقشاسىنا جينالىس بارىسىندا ەسىمىنىڭ گلەيزي لۋلا حوففمانن دەپ جازىلۋىن ءوتىندى.
اكسياعا قاتىسۋشىلاردىڭ ءبارى برازيليانىڭ ۇلتتىق كونگرەسىنە ءوتىنىش حاتتار جازعان.
ايتا كەتەيىك، جەمقورلىقپەن ۇستالعان برازيليانىڭ ەكس-پرەزيدەنتى 12 جىلعا سوتتالعان. لۋلا دا سيلۆا اپپەلياسيالىق شاعىم قارالماي بوستاندىقتا بولۋىن وتىنگەن. الايدا سوت ايىپتاۋ شاراسىن جۇزەگە اسىرۋ ءۇشىن ساياساتكەردى تۇرمەدە ۇستاۋدى ءجون كوردى.
پىكىر قالدىرۋ