Amnesty International ۇيىمىنىڭ دەرەگىنە سۇيەنسەك، بىلتىر الەم بويىنشا 993 ادام ءولىم جازاسىنا كەسىلگەن، ال 2016 جىلعى كورسەتكىش 4 پايىزعا تومەن بولعان.
ءولىم جازاسى الەمنىڭ 23 مەملەكەتىندە تىركەلدى. كورسەتكىشتىڭ 84 پايىزى ءتورت مەملەكەتكە ءتان. ولار: يران، ساۋد ارابياسى، يراك جانە پاكىستان. ال 21،9 مىڭ ادام ءولىم جازاسىنىڭ ورىندالۋىن كۇتىپ وتىر.
Amnesty International دەرەگىنە سۇيەنسەك، بەلارۋسيا بيلىگى ءولىم جازاسىنان باس تارتۋ نەمەس جازانى جەڭىلدەتۋ شارالارىن ويلامايتىن سەكىلدى. 2018 جىل باستالعالى ەلدە ەكى ادام ءولىم جازاسىنا كەسىلىپ، ءتورت ادام ۇكىمنىڭ ورىندالۋىن كۇتىپ وتىر. «بەلارۋسيا ەۋروپا مەن ورتالىق ازيادا ءولىم جازاسىنا كەسۋ شاراسى جالعاسىپ كەلە جاتقان سوڭعى مەملەكەت»، - دەلىنگەن ۇيىنىڭ بايانداماسىندا.
2017 جىلى گۆينەيا مەن موڭعوليا بارلىق قىلمىس ءۇشىن ءولىم جازاسىن الىپ تاستادى. بۇل جولدى كەنيا دا جالعاستىردى. بۋركينا-فاسو مەن چادا دا ءولىم جازاسىنان باس تارتۋ تۋرالى زاڭ قابىلدادى.
كەي مەملەكەتتەر ەسىرتكىمەن بايلانىستى قىلمىستاردىڭ بارىنە ءولىم جازاسىن قولدانادى. ولار – جۇڭگو، يران، ساۋد ارابياسى جانە سينگاپۋر. مالايزيا مەن ۆەتنامداعى ءولىم جازالارىن ورىنداۋ شارالارى قۇپيا تۇردە جۇرگىزىلەتىندىكتەن ەسىرتكىگە بايلانىستى جازانى انىقتاۋ مۇمكىن بولمادى.
2017 جىلى سينگاپۋردا ەسىرتكىمەن ۇستالعان سەگىز ادامدى دارعا استى. ساۋد ارابياسىندا دا ءدال وسىنداي كورسەتكىش بايقالدى.
يراندا 18 جاسقا تولماعان بەس ادام ءولىم جازاسىنا كەسىلدى، ال 80 ادام ۇكىمنىڭ ورىندالۋىن كۇتىپ وتىر.
Amnesty International ۇيىمى انىقتاعانداي، ادامدار ءوز كىنالارىن قيناۋ، ازاپتاۋ ارقىلى مويىنداعاننان كەيىن ولارعا ءولىم جازاسى ۇكىمى تاعايىندالىپ وتىرعان.
پىكىر قالدىرۋ