دەنساۋلىق سالاسىنىڭ وتكەن جىلعى جۇمىسىن قورىتىندىلاعان القا ءوتتى. وعان الماتى وبلىسى اكىمىنىڭ ورىنباسارى جاقسىلىق ومار باسشىلىق ەتتى. جيىندا وبلىستىق دەنساۋلىق ساقتاۋ باسقارماسىنىڭ باسشىسى باۋىرجان ىسقاق ءسوز الدى.

– 2017 جىلى وبلىستىق دەنساۋلىق ساقتاۋ سالاسىنا بولىنگەن قارجى 82،8 ملرد. تەڭگەنى قۇرادى. ونىڭ 74،7 ملرد. تەڭگەسى رەسپۋبليكالىق، 8،1 ملرد. تەڭگەسى جەرگىلىكتى بيۋدجەت قورجىنىنان بولىنگەن، – دەدى ول. انا ءولىمى ءجيى ورىن العان جامبىل اۋدانى اكىمىنىڭ ورىنباسارى داستان شالتابايەۆ ورنىنان تۇرعىزىلدى. ول بىردەن جالانى و دۇنيەلىك بولىپ كەتكەن انانىڭ وزىنە جاپتى.

– ول بۇل بالانى نەكەسىز تاپپاق بولعان. ءبىزدىڭ جاقتا ءبىر اداممەن ازاماتتىق نەكەدە تۇرعان. ءار جەردەن كەلىپ، اركىمنەن بالا تاپقانداردىڭ دەنساۋلىعىنا نەگە ءبىز جاۋاپ بەرۋىمىز كەرەك. ول باسقا جاقتىڭ ادامى. اركىممەن ارجەردە ءجۇرىپ جۇكتى بولعانداردىڭ ولىمىنە ءبىزدى كىنالايسىزدار. بۇل ماسەلەنى مينيسترلىكتىڭ الدىنا قويۋ كەرەك، – دەپ قولىن سەرمەپ، مىنەز كورسەتتى. ءسوزدى سوڭىنا دەيىن تىڭداعان جاقسىلىق مۇقاش ۇلى مەملەكەتتىك قىزمەتكەردىڭ مىنا قىلىعىنا اشۋىن جاسىرا المادى.

– ءسىزدىڭ ادام تاعدىرىنا دەگەن كوزقاراسىڭىز دۇرىس ەمەس. ونىڭ كىمنەن بالا تاپقانىندا شارۋاڭىز قانشا؟ ول ونىڭ تاعدىرى! دۇنيەگە ۇرپاق اكەلگىسى كەلدى. ءوسىپ-ونىپ، دەموگرافياعا اتسالىسپاقشى بولدى. قايدان كەلسە دە مەديسينا كومەك كورسەتۋى ءتيىس. ول ءبىزدىڭ قانداسىمىز. جۇكتى ايەلگە مەملەكەتىمىزدە بارلىق جاعداي جاسالادى. ەكىقابات ايەلدىڭ اعزاسىندا اۋىر سىرقاتى بار ەكەنىن ءبىلىپ تۇرىپ، نەمقۇرايلى قاراعانسىزدار. كۇشتەپ بولسا دا ەمدەلۋىنە جاردەمدەسۋلەرىڭىز كەرەك ەدى. ەندى جاۋاپكەرشىلىكتەن قاشىپ، ۋقيت-سۋقيت دەپ قۇتىلۋدىڭ امالىن ويلاپ وتىرسىز، – دەپ كوپتىڭ كوكەيىندەگى ويىن ءدوپ باستى.

سوندا دەيمىز-اۋ، انا مەن بالاعا قامقور بولادى دەگەن بيلىك باسىنداعىلاردىڭ ايتىپ تۇرعانى مىناۋ؟! ءسوزى مەن پايىمداۋىنىڭ ءوزى مەملەكەتتىك قىزمەتكەردىڭ ادەبىنە جاتپايدى. باسقانى بىلمەيمىن، بۇقارالىق اقپارات قۇرالدارىنىڭ وكىلدەرى بىر-بىرىمىزگە قاراسىپ، مىنا سوزگە ءىشىمىزدىڭ قارا قازانداي قايناعانىن بايقاتتىق. قازاق اتام ومىردەن وتكەندەر جايلى عايبات ءسوز ايتپاۋشى ەدى. مىنا كىسىنىكى قاي ساسقانى؟

جيىندا وبلىسقا دارىگەرلەر تارتۋ، مەكەمەنى باسقارا المايتىن باسشىلاردى اۋىستىرۋ، مەملەكەتتىك جانە جەكەمەنشىك ارىپتەستىكتى نىعايتۋ، قايىرىمدىلىق قورلارىمەن ىنتىماقتاستىق ورناتۋ، مەرەكەلەردە باس دارىگەرلەردىڭ ەمدەۋ ورنىندا بولۋى جايلى ءسوز بولدى. ءبىراق، كوكەيدە كەپتەلىپ تۇرىپ العانى جامبىل اۋدانى اكىمىنىڭ ورىنباسارى داستان تۇراربەك ۇلىنىڭ انالار جايلى ايتقان اۋىر ءسوزى ەدى.

«جەتىسۋ» گازەتى