قاراعاندى وبلىسىندا كاسىپكەر ءبۇتىن ءبىر اۋىلدى ساتۋعا قويدى، اۋىلدىق اكىمدىكتىڭ عيماراتى دا ج ش س قوجايىنىنا تيەسىلى، دەپ حابارلايدى Qamshy.kz اقپارات اگەنتتىگى Today.kz سايتىنىڭ دەرەگىن نەگىزگە الىپ. 

قاراعاندى وبلىسى، وساكاروۆ اۋدانى، شۇڭقىركول اۋىلىن ساتاتىنى تۋرالى حابارلامانى كاسىپكەر Instagram الەۋمەتتىك جەلىسىنە ىلگەن. 

«اۋىلداعى نىسانداردىڭ مەملەكەتتىك ەمەس ەكەندىگىن جەرگىلىكتى اكىمدىكتەن بىلدىك. ءبىزدىڭ اۋىلدىڭ قوجايىنى ءبىر فەرمەر ەكەن. اۋىلدىق مادەنيەت ءۇيى، اۋىل ىشىندەگى جولدار، جايىلىم، ءتىپتى اكىمدىك عيماراتىنا دەيىن سونىڭ مەنشىگىندە»، – دەيدى شۇڭقىركول اۋىلىنىڭ تۇرعىنى باقىتجان نۇرپەيىسوۆ. 

اۋىل تۇرعىندارى بۇل حابارعا اڭ-تاڭ بولىپ وتىرعاندارىن ايتتى. 

«ءبۇتىن ءبىر اۋىل جەكە تۇلعاعا تيەسىلى دەگەن قالاي؟ اكىمدىك عيماراتتى بيزنەسمەننەن قالاي جالعا الىپ وتىر؟ تۇرعىنى بار، ءۇيى بار، مالى بار اۋىلدى ساتۋعا بولا ما؟ بۇل 17 مىڭ گەكتار جەر»، – دەيدى اۋىل تۇرعىنى. 

وساكاروۆ اۋدانىنىڭ اكىمدىگى اكىمنىڭ ءبىرىنشى جانە ەكىنشى ورىنباسارلارى جينالىستا ەكەنىن ايتىپ، كەيىنىرەك پىكىر بىلدىرەتىندەرىن جەتكىزدى. اۋداندىق اكىمدىك ج ش س يەسىنىڭ جول جوندەپ، كاسىپورىن اشىپ، اۋىل تۇرعىندارىنا جۇمىس تاۋىپ بەرۋ ءۇشىن ينۆەستور ىزدەپ جاتقانىن دا ايتتى. 

قاراعاندى وبلىسىنىڭ باسپا ءسوز قىزمەتى دە اتالعان جايتقا بايلانىستى پىكىردى كەيىنىرەك بەرەتىندەرىن حابارلادى. 

شۇڭقىركول اۋىلىندا 587 ادام تۇرادى.