الماتىدا ش.ايمانوۆ اتىنداعى «قازاقفيلم» كينوستۋدياسىندا قازاقستان رەسپۋبليكاسى پارلامەنتى سەناتى الەۋمەتتىك-مادەني دامۋ جانە عىلىم كوميتەتىنىڭ وتاندىق كينەماتوگرافيستەرىمەن كوشپەلى وتىرىسى ءوتتى. كەزدەسۋدە «كينەماتوگرافيا تۋرالى» زاڭ جوباسى تالقىلاندى.
ءىس-شارانى اشقان كوميتەت ءتورايىمى ءبىرعانىم ءايتىموۆا: «كينەماتوگراف تاربيەلەۋ، يدەلوگيالىق قۇندىلىقتاردى دارىپتەۋدەگى باستى قۇرالداردىڭ ءبىرى بولىپ تابىلادى. قوعامنىڭ ينتەللەكتۋالدى جانە مادەني دامۋىنىڭ قوزعاۋشى كۇشى» دەپ بەلگىلەدى. سونداي-اق، ءبىرعانىم ءايتىموۆا، سەناتورلاردىڭ قازاق كينەماتوگرافياسىنىڭ بۇگىنگى جاعدايىن، تۇيىتكىلدى ماسەلەللەرىن، ساپاسىن كوتەرۋ، ۇلتتىق فيلمدەردىڭ باسەكەلەستىگىن ارتتىرۋ، ايماقتاعى مەكەندەرگە كينوكورسەتىلىمدەردىڭ قولجەتىمدى بولۋىن، وتاندىق كينونىڭ شەتەلدە مويىندالۋىن زەرتتەپ جاتقاندارىن جەتكىزدى.
تانىمال رەجيسسەرلەر، اكتەرلەر جانە پروديۋسەرلەر سەناتورلارعا جۇمىس بارىسىنداعى ەرەكشەلىكتەر مەن كينو تۋرالى زاڭنىڭ قابىلدانۋىنىڭ قاجەتتىلىگىن ايتتى. ناقتىراق ايتار بولساق، رەجيسسەر رۇستەم ءابدىراش ۇلتتىق كينو قوردىڭ قۇرىلىۋىنىڭ ماڭىزدىلىعىن، كينوپروكاتشى باۋىرجان شۇكەنوۆ كينەماتوگرافيا سالاسىنداعى قۇقىقتىق رەتتەۋ ماسەلەسى جانە اۋىل مەن شەت ايماقتاعى تۇرعىندارعا كينونىڭ قولجەتىمدى بولۋىنا نازار اۋدارۋ كەرەكتىگىن ايتتى. رەجيسسەر-انيماتور اداي ءابىلدينوۆ انيماسيالىق كينونىڭ تاربيە قۇرالى رەتىندە دامۋىن ءسوز ەتسە، كينورەجيسسەر «دۋبلياج» ءشوب جەتەكشىسى بولات قالىمبەتوۆ، ەلىمىزدىڭ كينوپروكاتىنا تۇسكەن فيلمدەردى دۋبلياجداۋ مىندەتتەلگەن ۋاقىتتا، «قازاقفيلم» نەگىزىندەگى دۋبلياج بىرلەستىگىنىڭ زور مۇمكىنشىلىگى تۋرالى اقپارات بەردى.
–– بۇگىندە «قازاقفيلم» كينوستۋدياسى – ۇلتتىق برەند جانە قازاقستان كينويندۋسترياسىنىڭ قوزعاۋشى كۇشى. ءبىز – قازاقستاننىڭ كينەماتوگرافيستەرى ەلىمىزدىڭ «كينەماتوگرافيا تۋرالى» زاڭىن كۇتىپ جۇرگەنىمىزگە كوپ بولدى. بۇل زاڭ: كينەماتوگرافيستەردىڭ، كينو وندىرۋشىلەردىڭ، پروكاتشىلاردىڭ، ديستريبيۋتورلاردىڭ جۇمىسىن رەتتەپ وتىرادى، كينو يندۋستريانىڭ ەكونوميكالىق تەتىكتەرىنىڭ دامۋىن قالىپتاستىرۋعا مۇمكىندىك بەرەدى. سونىمەن قاتار سالىقتىق ارتىقشىلىقتار، كەدەندىك جەڭىلدىكتەر جانە مەملەكەتتىك سۋبسيديالاۋ مەحانيزمى سياقتى نارىقتىق مەحانيزمدەر ارقىلى جاعىمدى ينۆەستيسيالىق كليمات قالىپتاستىرادى، – دەدى ش.ايمانوۆ اتىنداعى «قازاقفيلم» اق پرەزيدەنتى باقىت قايىربەكوۆ.
كسرو حالىق ءارتيسى، تانىمال اكتەر ءاسانالى ءاشىموۆ «قازاقفيلم» كينوستۋدياسىنا ۇلتتىق كومپانيا مارتەبەسىن قايتارۋ تۋراسىندا ءسوز قوزعادى: «بۇل كينوستۋديا ەلىمىزدىڭ بارلىق كينوگەرلەرىن بىرىكتىرەتىن ورتاق ءبىر شاڭىراق. وسى جەرگە ءبارىمىز جينالىپ كينو توڭىرەگىندە اڭگىمە قۇرامىز. سوندىقتان دا كينوستۋديانىڭ تەرريتورياسى تەك مەملەكەتكە عانا تيەسىلى بولىپ، جەكە مەنشىككە وتپەۋى ءتيىس. كينوستۋدياعا ۇلتتىق كومپانيا دارەجەسىن قايتارۋ كەرەك، - دەدى ا.ءاشىموۆ.
وتىرىستى سەناتور ب.ءايتىموۆا قورىتىندىلادى. ول بۇگىنگى كينەماتوگرافيا جانە مادەنيەتتىڭ، ونىڭ ىشىندە الەۋمەتتىك سالالاردىڭ دامۋىن رەتتەيتىن زاڭ جوباسى قاراستىرىلعان كەزدە وتىرىستا ايتىلعان پىكىرلەر مەن ۇسىنىستار مىندەتتى تۇردە ەسكەرىلەتىنىن جەتكىزدى.
«قازاقفيلمگە» كەلگەن دەپۋتاتتار كينوستۋديانىڭ تىنىس-تىرشىلىگىمەن جانە ونىڭ تەحنيكالىق مۇمكىندىكتەرىمەن تانىستى. ەكسكۋرسيا بارىسىندا ولارعا فيلمدەردى جارىققا شىعارۋ ءۇردىسىنىڭ ەرەكشەلىكتەرى تۋرالى جانە قازاقستاننىڭ التىن قورىنا ەنگەن فيلمدەردىڭ شىعۋ تاريحى تۋرالى دا باياندالدى.
- كينوستۋدياعا قازاق كينوسىنىڭ مۇراجايى كەرەك ەكەندىگىن تۇسىندىك. ويتكەنى ەلىمىزدىڭ مادەني قۇندىلىقتارىنىڭ بارلىعى وسى جەردە. وسى جونىندە ءبىز دەپۋتاتتىق ساۋال جولدايتىن بولامىز، - دەدى ەكسكۋرسيا سوڭىندا دەپۋتات باقىتجان جۇماعۇلوۆ.
پىكىر قالدىرۋ