پەتروپاۆلدا بىرنەشە جىل بۇرىن اپاتتى دەپ تانىلعان ەكى قاباتتى تۇرعىن ءۇيدىڭ قابىرعاسى وپىرىلىپ ءتۇستى. توتەنشە جاعداي 21 ساۋىردە بەرەكە ىقشام اۋدانىندا بولدى.

كۋاگەرلەر مەن جەرگىلىكتى بيلىك قۇرباندار مەن جارالانعاندار جوق دەيدى.

1950 جىلى سالىنعان ورال كوشەسىندەگى № 4 ءۇي بىرنەشە جىل بۇرىن اپاتتى دەپ تانىلعان. وندا ءۇش وتباسى — بارلىعى 13 ادام تۇرعان. توتەنشە جاعدايدان كەيىن، ادامدار كوشىرىلىپ، عيماراتتى قورشاۋعا الدى.

وقيعا ورنىنا كەلگەن پەتروپاۆل اكىمى مارات تاسماعانبەتوۆ تۇرعىندارعا ۋاقىتشا باسپانا بەرىلەتىنىن ايتتى.

"بۇگىن بىزدە اپاتتى باسپانالار ءۇشىن جەكە ءتۇرعىن-ۇي قورى جوق. سول سەبەپتى ءبىز سىزدەرگە ءقازىر ۋاقىتشا باسپانا بەرەمىز. كەيىن بۇل ماسەلەنى شەشەتىن بولامىز"،- دەدى ول.

پەتروپاۆلدا اپاتتى دەپ تانىلعان 19 كوپقاباتتى ءۇي بار. ازاتتىق وسىعان دەيىن سولتۇستىك قازاقستان وبلىسىنداعى بىرنەشە اپاتتى ءۇيدىڭ جاعدايى تۋرالى ايتقان.