26 ساۋىردەن 27-سىنە قاراعان ءتۇنى ءىرى تەحنولوگيالىق كومپانيالاردىڭ جەلىلىك ادرەستەرى روسكومنادزوردىڭ قارا تىزىمىنە ەندى، دەپ جازادى Qamshy.kz اقپارات اگەنتتىگى.

تىزىمدە «تۆيتتەر»، «ودنوكلاسسنيكي»، Yahoo! جانە LiveInternet سىندى 200-گە جۋىق IP-ادرەسى ەندى. روسكومنودزور بۇعاتتالعان جاڭا ءتىزىمدى ازىرگە جاريالاعان جوق.

بۇعان دەيىن ماسكەۋدىڭ تاگانسك اۋداندىق سوتى 13 ءساۋىر كۇنى رەسەي اۋماعىندا Telegram مەسسەندجەرىن بۇعاتتاۋ تۋرالى شەشىم شىعارعان. سوت شەشىمى بويىنشا، Telegram قىزمەتى كومپانيا «فەدەرالدىق قاۋىپسىزدىك قىزمەتىنىڭ اقپاراتتى شيفرلاۋ كىلتىن بەرۋ تالابىن ورىنداعانعا دەيىن» شەكتەلمەك.

ال 16 ساۋىردە سوت شەشىمىمەن Telegram مەسسەندجەرى بۇعاتتالا باستاعان. روسكومنادزور سونىمەن قاتار تىيىم سالىنعان سايتتارعا كىرۋ قۇرالدارىنا دا تىيىم سالاتىنىن مالىمدەدى.

Telegram-نىڭ نەگىزىن سالۋشى پاۆەل دۋروۆ «رەسەيلىكتەردىڭ قۇپيا حات الماسۋ قۇقىعىن قايتارۋعا كۇرەسەتىنىن» مالىمدەگەن. ونىڭ ايتۋىنشا، Telegram-عا تىيىم سالىنسا، رەسەيدە ۇلتتىق قاۋىپسىزدىك دەڭگەيى تومەندەپ كەتەدى.