«رۋحاني جاڭعىرۋ» ورتالىق جوبالاردى باسقارۋ كەڭسەسىندە «توعىز اۋليە» زيراتىنا ءبىرىنشى ەكسپەديسيا جاساۋ تۋرالى شەشىم قابىلداندى، دەپ حابارلايدى Qamshy.kz اقپارات اگەنتتىگى ىشكى ساياسات باسقارماسىنىڭ باسپا ءسوز قىزمەتىنە سىلتەمە جاساپ.
ءوڭىر بويىنشا جوبالىق كەڭسەنىڭ ۇسىنۋىمەن مامىر ايىندا اقمولا وبلىسىنىڭ مادەنيەت باسقارماسى، «كيەلى قازاقستان» عىلىمي زەرتتەۋ ورتالىعى جانە ورتالىق ساراپتاما كەڭەسىنىڭ مۇشەلەرىنەن جاساقتالعان ارنايى توپ قازاقستانداعى قاسيەتتى مەكەندەردىڭ تىزىمىنە «توعىز اۋليە» زيراتىن دا قوسۋ ءۇشىن ءبىرىنشى زەرتتەۋ ەكسپەديسياسىنا اتتاناتىن بولدى.
ەلباسى نۇرسۇلتان نازاربايەۆ ءوزىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ارنايى جوبالاردىڭ ءبىرى رەتىندە «قازاقستاننىڭ كيەلى جەرلەرى» جوباسىن اتاپ ءوتتى. ءسوزسىز ول – مادەنيەتتى، وزىندىك ۇلتتىق كودتى ساقتاۋ ءۇشىن.
ءپاتريوتيزمنىڭ ەڭ ماڭىزدى بەلگىسى – تۋعان جەرىنە، مادەنيەتىنە، سالت-داستۇرىنە دەگەن ەرەكشە كوڭىلدى قالىپتاستىرۋ. قازاقستانداعى ەسكەرتكىشتەردى، عيماراتتاردى، قۇرىلىستاردى قالپىنا كەلتىرىپ قانا قويماي، قاسيەتتى مەكەندەردى ۇلتتىڭ ساناسىنا ءبىرتۇتاس كيەلى ۇعىم رەتىندە سىڭىرە الۋ. وسىنداي توپقا قوسۋعا بولاتىن قازاقستانداعى قاسيەتتى مەكەننىڭ ءبىرى – استانادان 150 شاقىرىم جەردەگى «توعىز اۋليە» زيراتى. ول جەردە قازاق دالاسىنىڭ بەلگىلى اعارتۋشىلارى مەن قايراتكەرلەرى جەرلەنگەن. ولاردىڭ ءبارى – ۇلتتىق سانا-سەزىمنىڭ ويانۋ كەزىندە ءومىر ءسۇرىپ، ەڭبەك ەتىپ، ءدىني تاقىرىپقا قۇرمەت كورسەتكەن قازاق زيالىلارىنىڭ وكىلدەرى. سونداي-اق، يسلامنىڭ رۋحاني-زياتكەرلىك مەكتەبى – تاساۋف (سوپىلىق جولىن) ۇستانعان، سونىڭ كومەگىمەن قازاقتار يسلام ءدىنىن قابىلداعان. وسى ەجەلگى «توعىز اۋليە» زيراتىندا وتىزعا جۋىق قاجىلار مەن ءوز زامانىنداعى بەلگىلى عالىمدار جانە بىرنەشە رەت قاجىلىققا بارعان ەر ادامدار جەرلەنگەن. سونىڭ ءبىرى – اقمولا وكرۋگىنىڭ اعا-سۇلتانى يبراھيم-قاجى جايىقباي. ولاردىڭ ىشىندە، وسى ۋاقىتقا دەيىن حالىققا بەلگىسىز: جانباتىر-حازىرەت، قۇتان-حازىرەت، الداجار-حازىرەت، جانتاس-حازىرەت، التا-حازىرەت، مۇسا-حازىرەت، قۇراندى جاتقا بىلگەن شەرنياز-قاري، نۇرتازا-حازىرەت، سادۋاقاس-حازىرەت، سوپى-كوپەي-حازىرەت، باقبەرگەن-حازىرەت جانە باسقالار.
