ق ر اۋىلشارۋاشىلىعى مينيسترلىگىندە قازاقستاننىڭ اۋىلشارۋاشىلىق ونىمدەرى قاي ەلدەرگە كەتىپ جاتقانى ايتىلدى. بۇل جايىندا Qamshy.kz اقپارات اگەنتتىگى Tengrinews.kz سايتىنا سىلتەمە جاساپ حابارلايدى.

پرەمەر-مينيستر باقىتجان ساعىنتايەۆتىڭ ايتۋىنشا، ءقازىر ەكسپورت سالاسىندا قارقىندى دامۋ بايقالادى.

«800 تاۋار پوزيسياسىندا 122 ەلگە ءوز تاۋارلارىمىزدى ەكسپورتتايمىز. 30 پايىزدىق ءوسىم بار»، - دەپ اتاپ ءوتتى باقىتجان ساعىنتايەۆ ۇكىمەت وتىرىسىندا.

«2017 جىلى اۋىلشارۋاشىلىق ونىمدەرىن ەكسپورتتاۋ ءىسى 12،5 پايىزعا ءوستى. نەگىزگى نارىق – وزبەكستان، اۋعانستان، رەسەي، تاجىكستان، يران، قىرعىزستان، تۇركيا، يتاليا جانە لاتۆيا ەلدەرى. اۋىلشارۋاشىلىق ونىمدەرىن ەكسپورتتاۋ كولەمى ۇلعايىپ كەلەدى»، - دەپ مالىمدەدى ق ر اۋىلشارۋاشىلىعى ۆيسە-مينيسترى ارمان ەۆنييەۆ.

ونىڭ سوزىنشە، نەگىزىنەن بيداي، ۇن، ماي، ارپا، وسىمدىك مايى، ماقتا تالشىقتارى مەن بۇرشاققا سۇرانىس كوپ.

«بۇگىندە جۇڭگو نارىعى بالىق ءوندىرۋ، قوي شارۋاشىلىعى، ارا شارۋاشىلىعىنا جانە جىلقىلارعا، سونداي-اق بيدايعا، كەبەك پەن سوياعا اشىق. يرانعا ءتىرى، مۇزداتىلعان جانە سالقىنداتىلعان قوي ەتىن جەتكىزۋدە كەدەرگىلەر جويىلدى. ناتيجەسىندە 2017 جىلى يرانعا العاش رەت 4 763 باس ءتىرى قوي جونەلتىلدى. ساۋد ارابياسى مەن بىرىككەن اراب امىرلىكتەرىنە ءىرى قارا مەن ۇساق مالدى جەتكىزۋدە كەدەرگىلەر جويىلدى. سونىمەن قاتار بىرىككەن اراب امىرلىكتەرىنە ەت پەن ەت ونىمدەرىن، تاۋىق جۇمىرتقالارى مەن ءۇي قۇستارىن جەتكىزۋدە بوگەت بولمايدى»، - دەپ اتاپ ءوتتى ۆيسە-مينيستر.