2018 جىلدىڭ 1 مامىرىندا قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى، فيلولوگيا عىلىمدارىنىڭ دوكتورى شورا شامعالي ۇلى سارىبايەۆ 93 جاسىندا ومىردەن ءوتتى. 

بۇل تۋرالى عالىمنىڭ تۋىستارى مەن ارىپتەستەرى الەۋمەتتىك جەلىدە حابارلادى.

«قازاق ءتىلى تاعى ءبىر ارىسىنان ايىرىلدى، اعايىن! بارلىق عۇمىرىن قازاق ءتىلىن زەرتتەۋگە باعىشتاعان اكادەميك شورا شامعالي ۇلى سارىبايەۆ اقساقال بۇگىن 93 جاسىندا ومىردەن وزدى. ورنى تولماس اۋىر قازا! مايرا، سالتانات، قايرات، قايعىلارىڭا ورتاقپىز. اعاتايىمنىڭ جانى ءجانناتتا بولسىن، ۇرپاقتارى امان بولسىن!»، - دەپ جازدى فيلوسوفيا عىلىمدارىنىڭ كانديداتى مۇرتازا ءجۇنىس ۇلى Facebook-تەگى پاراقشاسىندا.

شورا شامعالي ۇلى سارىبايەۆ 1925 جىلى 2 ناۋرىزدا تاشكەنت قالاسىندا دۇنيەگە كەلگەن. ءتىل ءبىلىمى مامانى، فيلولوگيا عىلىمي دوكتورى (1974 ج.)، پروفەسسور. (1979 ج.)،  ق ر ۇعا كوررەسپوندەنت مۇشەسى، (1983 ج.)، قازاقستاننىڭ ەڭبەك سىڭىرگەن عىلىم قايراتكەرى (1985). ونىڭ عىلىمي زەرتتەۋ ەڭبەكتەرى ديالەكتولوگيا، مورفولوگيا، لەكسيكولوگيا، لەكسيكوگرافيا، بيبليوگرافيا، ءتىل تاريحى، اۋدارما، ەسىمناما، التايستيكا ماسەلەلەرىنە ارنالعان. 250-دەن استام عىلىمي ماقالالارى مەن وقۋلىقتارى، مونوگرافيالارى جارىق كورگەن. س.امانجولوۆتىڭ تىلدەگى ديالەكتىلەردى توپتاۋ تەورياسىن ءارى قاراي دامىتىپ، ديالەكتولوگيا سالاسىنداعى تەرميندەردىڭ قالىپتاسۋىنا اتسالىسقان. "قازاق ءتىلىنىڭ قىسقاشا ەتيمولوگيالىق سوزدىگىن" (1966)، "قازاق ءتىلىنىڭ ديالەكتولوگيالىق سوزدىگىن" (1969)، "جاڭا اتاۋلار سوزدىگىن" (1992) قۇراستىرۋعا قاتىسقان.

1965 جىلى اقش-تاعى گارۆارد كورپوراسياسىنىڭ مۇشەلىگىنە سايلانعان، گفر-دا (1975)، تۇركيادا (1994) وتكەن حالىقارالىق كونگرەسس، كونفەرەنسيالاردا باياندامالار جاساعان.

مارقۇممەن قوشتاسۋ ءراسىمى 3 مامىردا ساعات 10.00-دە الماتىداعى عىلىم اكادەمياسى عيماراتىندا (قۇرمانعازى كوشەسى، 29ء-ۇي) وتەدى.