قازاقستاننىڭ بالا قۇقىقتارى جونىندەگى ۋاكىلى زاعيپا بالييەۆا جەل ۇشىرعان باتۋتتا بالالاردىڭ زارداپ شەگۋى وقيعاسىنا قاتىستى پىكىر ءبىلدىردى.

«جاۋاپكەرشىلىك باتۋت يەلەرىنىڭ موينىندا. ولار ارنايى ەرەجەنى ساقتاۋ كەرەك ەدى. تەكسەرۋ بولادى. مەن استانا اكىمدىگىنە، تجد-عا حات دايىنداپ جاتىرمىن. ءبىز ويىن الاڭدارى مەن اۆتوماتتارىن ورنالاستىرۋ ەرەجەلەرى مەن تالاپتارىن ورىنداۋى بويى بىرلەسكەن تەكسەرۋ جۇرگىزەمىز. ءبىز ەلىمىزدىڭ بارلىق اۋماعىندا تەكسەرۋ جۇرگىزۋگە باستاماشىلىق ەتپەكپىز»، - دەپ حابارلادى ز.بالييەۆا قازاقپارات تىلشىسىنە.

ونىڭ ايتۋىنشا، ويىن اتتراكسيوندارىن ورناتۋ كەزىندە ءوڭىردىڭ كليماتتىق جاعدايىن مىندەتتى تۇردە ەسەپكە الۋ كەرەك.

«بۇل بارىمىزگە ساباق بولدى، ءار ەلدى مەكەننىڭ تابيعي جاعدايى ەسكەرىلۋ كەرەك. استانادا ءجيى جەل تۇرادى، سوندىقتان باتۋتتى ورناتۋ كەزىندە وسىنى نازارعا الۋ قاجەت. ونىڭ يەلەرى دە ويىن اۆتوماتتارى مەن الاڭداردى ورناتۋ كەزىندە ەڭ الدىمەن بالالاردىڭ قاۋىپسىزدىگىن ەسەپكە الۋلارى ءتيىس»، - دەپ اتاپ ءوتتى ول.

سونىمەن قاتار، ز.بالييەۆا مۇنداي جاعدايدا بارلىعى، سونىڭ ىشىندە اۋا رايىنىڭ قولايسىزدىعى تۋرالى بىلمەگەن اتا-انالار دا جاۋاپتى ەكەندىگىن اتاپ ءوتتى.

«بارلىعى اباي بولۋى كەرەك: يەلەرى دە، اتا-انالار دا، بۇكىل قوعام دا. جەل سوعاتىنى تۋرالى بارلىعى ءبىلدى. اتا-انالار باتۋتتى مىقتاپ بەكىتكەندىگىنە ۇمىتتەنگەن. ولار، ءوز كەزەگىندە بارلىق جاعدايدى ەسەپكە العان جوق. ولار اۋا رايى تۋرالى اقپارات العان كەزدە باتۋتتىڭ بەكىتىلگەندىگىنە تاعى ءبىر رەت زەر سالۋلارى ءتيىس ەدى»، - دەدى ول.

ەسكە سالايىق، «جاننۇر» ساۋدا ورتالىعىنىڭ اۋماعىندا بالالار ويناپ جۇرگەن باتۋتتى جەل ۇشىرىپ جىبەرگەن. ق ر ءىىم تجك دەرەگى بويىنشا، باتۋت بەكىتىلگەن جەردەن 20 مەترگە دەيىن ۇشىپ كەتكەن. سونىڭ سالدارىنان بەس بالا ءتۇرلى جاراقات الىپ، اۋرۋحاناعا جەتكىزىلدى. №2 قالالىق بالالارا اۋرۋحاناسى دارىگەرلەرىنىڭ ايتۋىنشا، ءتورت بالا اۋىر حالدە جاتىر