ق ر باس پروكۋرورى قايرات قوجامجاروۆتىڭ نازارىنا!

ق ر ىشكى ىستەر ءمينيسترى قالمۇحامبەت قاسىموۆتىڭ نازارىنا!

ق ر ادام قۇقىقتارى جونىندەگى ۋاكىل اسقار شاكىروۆتىڭ نازارىنا!

وسىدان بىرەر كۇن بۇرىن سايتىمىزدا سەكس-قۇلدىقتان قاشىپ شىعىپ، بازارداعى حالىقتان كومەك سۇراعان قىزدىڭ ۆيدەولارى جاريالانعان ەدى. 5 مامىردا الماتىداعى «ساياحات» اۆتوبەكەتىنىڭ ماڭىندا بولعان وقيعا قوعامدا قاتتى تالقىلاندى. جابىرلەنگەن قىزدىڭ تاعدىرىنا الاڭداۋشىلار كوبەيدى.

Qamshy.kz اقپارات اگەنتتىگى ءمان-جايدى ءبىلۋ ءۇشىن جۋرناليستىك زەرتتەۋ جۇرگىزدى. ىندەتىپ ىزىنە ءتۇسىپ، ەڭ الدىمەن راۋشاندى قىلمىسكەرلەردەن اراشالاپ العان «جەلتوقسان-86» قوعامدىق ۇيىمىنىڭ ءتورايىمى گۇلباحرام ءجۇنىسوۆانى تاپتىق (ۆيدەودا راۋشاندى قۇشاقتاپ تۇر). ول كىسى بازارعا كەرەگىن الۋعا بارىپ، ويدا جوقتا قىزدىڭ قاسىنان تابىلىپتى.

– ءقازىر مەن قىزدىڭ جانىندا اۋرۋحانادا وتىرمىن. بۇل وقيعا تۋراسىندا پروكۋراتۋراعا حابارلاپ، ماسەلە كوتەرىپ جاتىرمىن. جاۋاپتى ورگاندارعا وسى شۋلى جاعدايدىڭ تۇبىنە جەتپەي قويمايتىنىمدى دا جەتكىزدىم. بۇل قىزدى ەندى ءبىر اللا عانا مەنىڭ قولىمنان الادى. ول جەردە تاعى دا وزبەكتىڭ، قىرعىزدىڭ، قازاقتىڭ 20 شاقتى قىزى بار. راۋشاننىڭ ايتۋىنشا، پريتوننىڭ بىرەۋى سەيففۋلين مەن ۆارشاۆسكايا كوشەلەرىنىڭ قيىلىسىنا تاياۋ، دۋلاتوۆ-17 مەكەن-جايىندا ورنالاسقان. ۇلكەن ءقوناقۇي دەيدى. يەسى مارال دەگەن ايەل ەكەن. ال كەشەگى كەلىنشەك بۇرىن ءدال وسىنداي قىلمىسپەن ۇستالعان. قىرعىزستاندىق ءنومىر تاققان كولىك قاشىپ ۇلگەردى. ءبىز ىزدەۋ سالىپ، ارىز بەردىك. دەگەنمەن ۆيدەوكامەرالاردا قايدا باعىت العانى، ءبارى ساقتاۋلى. جاقىن كۇندەرى ۇستالادى دەپ ۇمىتتەنەمىز. ءقازىر راۋشان پسيحولوگيالىق تۇرعىدا وتە اۋىر جاعدايدا. ابدەن ءزابىر كورىپ شوشىنعان. ءتىپتى مەن قىزدىڭ جالعىز ءوزىن پالاتادا تاستاپ كەتۋگە قورقىپ وتىرمىن. سەبەبى بۇعان دەيىن پريتون يەلەرى پوليسيادان دا، اۋرۋحانادان دا قىزداردى اقشا بەرىپ الىپ كەتىپ جۇرگەن ەكەن. 4 جىل بويى قىزداردى الداپ اكەلىپ، ازاپتاپ، مازاقتاپ، بۇگىنگىدەي جاعدايعا جەتكىزگەن. راۋشاننىڭ ءحالى كەشەگىدەن گورى جاقساردى، وز-وزىنە ەندى كەلدى. بازارعا مەن ءوزىم قاجەت زاتىمدى الۋعا باردىم. جانىمدا بازارداعى ساۋداگەرلەر، باسقا دا ءبىر توپ ازامات بولدى. قىلمىسكەرلەر قولىنداعى ەڭ باعالى دۇنيەسىنەن ايرىلعانداي قىزدى مەنىڭ قولىمنان جۇلىپ اكەتپەكشى بولدى. مەن ولاردا قارۋ بولعانىنا 100 پايىز كەپىلدىك بەرەمىن. ول قىزدى نەگە ىزدەيدى؟ البەتتە، نانىنان ايرىلىپ جاتقاسىن وسىلاي ابىگەرگە تۇسەدى. بۇلاردىڭ قولىنداعى قىزدار جىلدار بويى ءوز ۇيلەرىن، باۋىرلارىن كورمەگەن. تاياقتىڭ استىندا ءومىر سۇرگەن. ءقازىر راۋشاننىڭ قاۋىپسىزدىگىنە ءوزىم جاۋاپتى بولىپ وتىرمىن، — دەيدى گۇلباحرام ءجۇنىسوۆا.

ونىڭ سوزىنشە، راۋشاننىڭ اكەسى قارعالى اۋىلىندا بىرەۋدىڭ مالىن باعادى ەكەن. ال ىنىسىنەن مۇلدە حابارسىز. بارلىق تۋعان-تۋىسىنان كۇدەر ۇزگەن. اناسى قايتىس بولعان. ال راۋشان سىندى تاعى 20 شاقتى قىزدى قۇلدىقتا ۇستاپ وتىرعان ءاپالى-سىڭىلى ۆەنەرا مەن ايگۇل دەگەن ايەلدەر جەتىسۋ اۋداندىق ىشكى ىستەر بولىمىندە قاماۋدا وتىرعان كورىنەدى.

گۇلباحرام جۇنىسوۆامەن سويلەسكەن سوڭ ءبىز جابىرلەنۋشىنىڭ ءوز اۋزىنان وسى قىلمىستىڭ جاي-جاپسارىن ەستيىك دەپ الماتى وبلىستىق اۋرۋحاناسىنا ارنايى باس سۇقتىق. راۋشان ءبىزدى سامارقاۋ قارسى الدى. دارىگەرلەر قويعان دياگنوز بويىنشا قىزدىڭ ميى شايقالعان، قول-اياعى جارالانعان. شوشىنىپ قالعان. ايتسە دە ءبىزدىڭ ساۋالدارىمىزعا تولىق جاۋاپ بەرە الدى. 4 جىلدا كورمەگەن قورلىعى قالماعان قىز و باستا جەڭىل جۇرىسكە ءوز ەركىمەن تۇسكەنىن مويىندادى.

— وسىدان ءتورت جىل بۇرىن «التىن وردا» بازارى ماڭىندا ءبىر تاكسيگە وتىردىم. جەزوكشەلىكپەن اينالىسۋدى ماعان سول كىسى ۇسىندى. «50-50 شارتىمەن جۇمىس ىستەيسىڭ، جاتار ورنىڭ، ىشەر اسىڭ تەگىن، قىدىراتىن جەرىڭە قىدىرىپ، ەلدەن ءتاۋىر ءومىر سۇرەسىڭ»، — دەدى. مەن كەلىستىم. ول ءوزىنىڭ ادامدارىنا حابارلاسىپ، ولار مەنى ءبىر ساعاتتىڭ كولەمىندە الىپ كەتتى. جارتى جىلداي ماعان ۇرماي، سوقپاي، بارىن بەرىپ، جاقسى قارادى. كەيىنىرەك ءبىر كۇندە 30 مىڭ تەڭگە «پلان» شىعاراسىڭ دەگەن تالاپ قويا باستادى. تاپپاسام، سوققىعا جىعىپ، وقتاۋمەن ۇراتىن. ۆەنەرا مەن ايگۇل كۇنى بويى ءوز ۇيلەرىنىڭ شارۋالارىن جاساتاتىن. ءسال قاتەلەسسەم، اياماي سابايتىن. باسىمنان پىشاقپەن ۇرىپ قان-جوسا قىلىپ، قاندى توقتاتا الماي وزدەرى دە ۇرەيلەنگەن كەزدەر بولدى. ۆەنەرا مەنى قوناقۇيگە اپارىپ، كەشكى ساعات 9-دان تاڭعى 6-عا دەيىن، شال دەمەي، ماس دەمەي، نەشە ءتۇرلى ەركەكتەرگە قىزمەت كورسەتۋگە ماجبۇرلەيتىن. كليەنتتەردەن كومەك سۇراعانىمدى ءبىلىپ قويعاندا ءولىمشى ەتىپ تەپكىلەگەن. ءبىر اپتا ەشتەڭەگە جاراماي قالدىم. ۆەنەرانىڭ اپكەسى ايگۇل جانى اشىپ ورتامىزعا تۇسەتىن.

راۋشاندى قورلاعان ۆەنەرا 

ۆەنەرانىڭ اپكەسى ايگۇل

ارامىزداعى ءبىر قىزدى ءوزىم قاشىرىپ جىبەردىم. وعان: «مەنى قۇتقار، مىنا جەردەن الىپ شىق»، — دەگەنمىن. ءبىراق جارتى جىل كۇتتىم، قىزدان حابار بولمادى. سونىڭ وزىندە ءبىر رەت قاشىپ كەتىپ، تۋىسىمنىڭ ءۇيىن پانالادىم. ۆەنەرا ادامدارىمەن كەلىپ، «التىن وردا» بازارىندا سامسا جەپ تۇرعان جەرىمنەن قولىمدى قايىرىپ الىپ كەتتى. تاعى دا تاياق جەدىم، وقتاۋ سىنعانشا ۇردى، قورلىقتىڭ نەشە ءتۇرىن كوردىم، — دەيدى راۋشان.

جابىرلەنۋشى وسىدان 10 شاقتى كۇن بۇرىن قاشىپ شىعىپتى. امالىن تاۋىپ وزدەرىن قاماپ ۇستايتىن ءۇيدىڭ ەسىگىن اشىپ، قىلمىسكەرلەردىڭ سىرتىنان كىلتتەپ كەتكەن. 10 كۇن بويى جەرتولەدە تۇنەپ جۇرگەن راۋشان 5 مامىر كۇنى «ساياحات» جاققا كەلەدى. سول جەردە ۆەنەرانىڭ 1998 جىلعى ۇلى كەزدەسىپ، قورقىتىپ-ۇركىتىپ، كولىككە ۇرىپ-سوعىپ وتىرعىزعان. باعدارشامعا جاقىنداعاندا راۋشان ءجۇرىپ بارا جاتقان كولىكتىڭ ەسىگىن اشىپ، سەكىرىپ تۇسكەن. قارسى بەتتە قاتتى كەلە جاتقان كولىك قىزدى قاعىپ، سول جەردە ەسىنەن تانعان. باعدارشام ماڭىنان ءوتىپ بارا جاتقان كەزدەيسوق  جىگىت راۋشاندى كوتەرىپ، حالىق كوپ شوعىرلانعان ورىنعا اكەلەدى. ولاردىڭ ارتىنان ىلە-شالا ارمان دەگەن جىگىت «قىزدىڭ اعاسىمىن» دەپ جۇلقىپ الىپ كەتپەكشى بولادى. بازاردىڭ ىشىندە ايعايعا باسقان قىزدى گۇلباحرام ءجۇنىسوۆا مەن ساۋداگەرلەر قورعاپ قالادى.

راۋشان بۇل پريتوننىڭ يەلەرى پوليسيا قىزمەتكەرلەرىمەن اۋىز جالاسقانىن جاسىرمادى. كەيدە قىزىل جاعالىلار جەزوكشە قىزداردى 3 ساعاتقا قاماپ قويادى ەكەن. 3 ساعاتتان كەيىن  قۇجاتى بار قىزدار بوساپ شىعادى دا، قۇجاتسىز قىزداردىڭ ءارقايسىسىنا پريتون يەسى 30 مىڭ تەڭگەدەن تولەپ، شىعارىپ الادى. كەيىن سول 30 مىڭ تەڭگەنىڭ ەسەسىن جۇمىس بارىسىندا قايتارىپ الادى.

— پوليسيا قىزمەتكەرلەرىنە «مەنى جىبەرمەي الىپ قالىڭدارشى» دەپ ايتۋعا قورقاتىنمىن. سەبەبى ولار ءبىزدىڭ يەلەرىمىزبەن بىرگە جۇمىس ىستەدى. مارال ەسىمدى 60 جاستان اسقان ايەل بىزگە: «جەردىڭ تۇبىنە تۇسسەڭدەر دە تاۋىپ الامىن»، — دەيتىن. ۆەنەرا مەن ايگۇل ءبىز سياقتى قىزداردىڭ ەڭبەگىن قاناپ، بورالداي جاقتاعى راحات اۋىلىنان ۇلكەن ءۇي سالىپ، سۋ جاڭا كولىكتەر ساتىپ العان. مۇنىڭ ءبارى – ءبىزدىڭ 4 جىل بويعى بەرەمىز دەپ ۋادە ەتكەن جالاقىمىزعا جاسالعان نارسە. ول جەردەگى قىزداردىڭ كوبى ءوز ەركىمەن جۇرگەن جوق. الداپ، ارباپ، قورلاپ ۇستاپ وتىر. يسايەۆا ماحاببات دەگەن قىرعىز قىزدى مۇگەدەك بولىپ قالعانشا تەپكىنىڭ استىنا الىپ، جىبەرە سالدى. قىلمىسكەرلەر لايىقتى جازاسىن السا ەكەن، – دەيدى راۋشان.

ەل-جۇرتتىڭ جاعاسىن ۇستاتقان جانتۇرشىگەرلىك جاعداي ەسكەرۋسىز قالماۋى كەرەك. Qamshy.kz اقپارات اگەنتتىگى قۇزىرلى ورىنداردان ءتيىستى شارالار قولدانۋدى تالاپ ەتەدى.

ارايلى جاقسىلىق