ارمەنيا پارلامەنتى وپپوزيسيا ليدەرى، "ەلك" پارتياسىنىڭ جەتەكشىسى نيكول پاشينياندى ەل پرەمەر-مينيسترى ەتىپ سايلادى دەپ جازادى ازاتتىق راديوسىنا سىلتەمە بەرىپ Qamshy.kz اقپارات اگەنتتىگى. داۋىس بەرۋ 8 مامىر كۇنى ءوتتى. پاشينيان كانديداتۋراسىن 59 دەپۋتات قولداپ، 42 دەپۋتات قارسى داۋىس بەرگەن.

ەندى پاشينيان ەكى اپتا ىشىندە ۇكىمەت مۇشەلەرىنىڭ ءتىزىمىن جاساپ، پرەزيدەنتكە ۇسىنۋى ءتيىس.

مامىردىڭ 1ء-ى كۇنى ارمەنيا پارلامەنتى دەپۋتاتتارى نيكول پاشينياننىڭ پرەمەر-مينيستر بولۋىنا قارسى داۋىس بەرگەن. ارمەنيا كونستيتۋسياسى ساي، پاشينيان پرەمەر-مينيستر بولىپ سايلانۋ ءۇشىن، ونى 105 دەپۋتاتتىڭ 53ء-ى قولداۋى ءتيىس ەدى. ءبىراق پارلامەنتتەگى ەڭ كوپ ورىنعا يە رەسپۋبليكا پارتياسى فراكسياسىنىڭ ءبىراز دەپۋتاتى پاشينيان كانديداتۋراسىن قولداماعان.

وسىدان كەيىن پاشينيان حالىقتى قايتا كوشەگە شىعۋعا ۇگىتتەگەن. مامىردىڭ 2ء-سى كۇنى حالىق جولدى جاۋىپ، نارازىلىق كۇشەيە تۇسكەندە رەسپۋبليكالىق پارتيا كەلەسى سايلاۋدا ۇسىنىلعان كانديداتتى قولدايتىندارىن ايتقان. پرەمەر-مينيستر سايلاۋى 8 مامىرعا بەلگىلەنگەن. پاشينيان جاقتاستارى بىرنەشە كۇنگە نارازىلىقتى توقتاتقاندارىن، ەگەر تالاپتارى ورىندالماسا قايتا كوشەگە شىعاتىندارىن مالىمدەگەن.

ءساۋىردىڭ ورتاسىنان بەرى ارمەنيادا تۇرعىنداردىڭ بيلىككە قارسى جاپپاي نارازىلىق باستالعان. حالىق قاتارىنان ەكى مەرزىم ەل پرەزيدەنتى بولعان رەسپۋبليكالىق پارتيا ليدەرى سەرج سارگسيان پرەمەر-مينيستر بولىپ سايلانۋىنا قارسى شىققان. ۇكىمەتكە قارسى حالىقتىڭ جاپپاي نارازىلىعىنان كەيىن وتستاۆكاعا كەتكەن ەدى.

وعان دەيىن سوڭعى ون جىلعا جۋىق ۋاقىت بويى سارگسيان ارمەنيا پرەزيدەنتى بولىپ وتىرعان كەزدە جۇرگىزىلگەن كونستيتۋسيالىق رەفورما ناتيجەسىندە پرەمەر-مينيستردىڭ قىزمەت وكىلەتى كەڭەيتىلگەن بولاتىن.