مەملەكەت باسشىسى الاكول اۋدانىنىڭ اقشي كەنتىندەگى تەمىر جول ۆوكزالىنىڭ جاڭا عيماراتىن ارالاپ كورگەن سوڭ، ەلىمىزدىڭ تۋريزم سالاسىن جانە كولىك-لوگيستيكا ينفراقۇرىلىمىن دامىتۋ ماسەلەلەرى جونىندە كەڭەس وتكىزدى.

جيىن بارىسىندا ءوڭىر باسشىسى اماندىق باتالوۆ نۇرسۇلتان نازاربايەۆقا الماتى وبلىسىنداعى ءتۋريزمنىڭ دامۋ بارىسى جونىندە باياندادى.

«سوڭعى ءتورت جىلدا وبلىستا تۋريستىك قىزمەت كورسەتۋ كولەمى ەكى ەسە ارتتى. بۇل كورسەتكىش 2014 جىلى 3،9 ملرد تەڭگەنى قۇراسا، 2017 جىلى 8،3 ميلليارد تەڭگەگە ءوستى. 2018 جىلى مۇنى 10 ملرد تەڭگەگە دەيىن جەتكىزۋدى جوسپارلاپ وتىرمىز. الاكول اۋدانىندا كورسەتىلگەن قىزمەت كولەمى 2017 جىلى 3،5 ملرد تەڭگەگە جەتىپ، 2014 جىلعى دەڭگەيمەن سالىستىرعاندا 8 ەسە ارتتى»، — دەدى الماتى وبلىسىنىڭ اكىمى.

ينۆەستيسيالار جانە دامۋ ءمينيسترى جەڭىس قاسىمبەك «نۇرلى جول» ينفراقۇرىلىمدى دامىتۋدىڭ مەملەكەتتىك باعدارلاماسىنىڭ جەرگىلىكتى جانە رەسپۋبليكالىق ماڭىزى بار اۆتوموبيل جولدارىن سالۋعا قاتىستى بولىگىنىڭ ىسكە اسىرىلۋ بارىسى جونىندە باياندادى.

«2017 جىلى رەسپۋبليكالىق ماڭىزى بار 4 مىڭ شاقىرىمنان استام اۆتوموبيل جولىنا جوندەۋ جۇمىستارى جۇرگىزىلدى. سونىڭ ىشىندە 603 شاقىرىم جول پايدالانۋعا بەرىلدى. جالپى، 2022 جىلعا دەيىن 24 مىڭ شاقىرىم جولدىڭ ءبارى ءبىر قالىپقا كەلەدى دەگەن ويدامىز»، — دەدى ينۆەستيسيالار جانە دامۋ ءمينيسترى.

سونداي-اق، كەڭەستە «قازاقستان تەمىر جولى» ۇك» اق پرەزيدەنتى قانات الپىسبايەۆ مەملەكەت باسشىسىنا 2020 جىلعا دەيىنگى الاكول دەمالىس ايماعىنداعى كولىكتىڭ قولجەتىمدىلىك كارتاسىن تانىستىرىپ، ترانزيتتىك تاسىمالداۋ ءىسىن دامىتۋ ستراتەگياسىنىڭ جۇزەگە اسىرىلۋى بارىسى جونىندە باياندادى.

مادەنيەت جانە سپورت ءمينيسترى ارىستانبەك مۇحامەدي ۇلى ىشكى جانە سىرتقى ءتۋريزمدى دامىتۋ جولىندا بارلىق كەدەرگىلەردى جويۋ ماقساتىمەن قازاقستان حالقىنا ارنالعان جولداۋدا بەرىلگەن تاپسىرمالاردىڭ ىسكە اسىرىلۋى، سونىمەن قاتار "ەكسپو"-نىڭ ءتيىمدى وزگەرىستەرىن قولداۋ ءۇشىن مينيسترلىك تاراپىنان اتقارىلىپ جاتقان شارالار جونىندە باياندادى.

«ەلىمىز ءتۋريزمنىڭ ەكونوميكالىق ناتيجەسىن "ەكسپو"-نى وتكىزۋ بارىسىندا ناقتى سەزىندى. سول كەزدە قازاقستانعا 7 ملن-نان استام تۋريست كەلدى. بۇل وتكەن جىلمەن سالىستىرعاندا 18%-عا ارتىق. ىشكى تۋريزم لەگى 20%-عا ءوسىپ، شامامەن 6 ملن ادامعا جەتتى»، — دەدى ۆەدومستۆو باسشىسى.

نۇرسۇلتان نازاربايەۆ كەڭەستىڭ جانە تۋريستىك كلاستەر نىساندارىن ارالاۋدىڭ قورىتىندىسى بويىنشا ورتالىق مەملەكەتتىك جانە جەرگىلىكتى اقتارۋشى ورگاندارعا قازاقستاننىڭ تۋريزم سالاسىن ودان ءارى دامىتۋ جونىندە ءبىرقاتار تاپسىرما بەردى.

«الاكول قازاقستان بويىنشا دەمالۋشىلار ەڭ كوپ باراتىن جەرگە اينالۋى كەرەك. ول ىڭعايلى جەردە ورنالاسقاندىعىمەن ەرەكشەلەنىپ، بارلىق ءوڭىردىڭ تۇرعىندارى ءۇشىن قولجەتىمدى بولىپ وتىر. كولدىڭ كەرەمەتتىگى سۋىنىڭ ەمدىك قاسيەتىنە بايلانىستى. ونىڭ قۇرامىندا رادون، ءسىلتى جانە باسقا دا پايدالى ەلەمەنتتەر بار. وسىعان بايلانىستى الاكول ەلىمىزدىڭ تۋريزم سالاسى ءۇشىن وتە ماڭىزدى»، — دەدى مەملەكەت باسشىسى.