بۇگىن Global Challenges Summit 2018 فورۋمىندا قازاقستان پرەزيدەنتى نۇرسۇلتان نازاربايەۆ مەملەكەتتەر اراسىنداعى كەلىسپەۋشىلىك سىندى ماسەلەلەرگە توقتالىپ ءوتتى، دەپ حابارلايدى Qamshy.kz اقپارات اگەنتتىگى.

«استانا ەكونوميكالىق فورۋمىنا قاتىسۋ جاقسى داستۇرگە اينالىپ كەلەدى. وسى ورايدا وسىندا كەلگەن قوناقتارىمىزعا، جالپى ءبىزدىڭ ازاماتتارعا العىسىمدى ايتامىن. 11ء-شى رەت فورۋم الەمدىك ەكونوميكانىڭ ينۆەستيسيالارى مەن يننوۆاسيالارىنىڭ ەڭ ماڭىزدى ماسەلەلەرىن تالقىلاۋ الاڭى بولىپ وتىر. بىلتىرعى فورۋمنان بەرى ءبىز الەمدەگى وراسان زور وزگەرىستەردىڭ كۋاسى بولىپ وتىرمىز. جاڭادان تەكەتىرەس، كونفرونتاسيالار پايدا بولۋدا، مەملەكەتتەر اراسىندا كەلىسىمگە كەلۋ قيىنداپ بارا جاتىر. اسىرەسە، ۇلكەن مەملەكەتتەر اراسىندا. ءوزارا سەنبەۋشىلىك، قارسىلاستىقتىڭ ۇستانىمىن ءتۇسىنۋدى قالاماۋ ءجيى ورىن الۋدا. بۇل الەم ءۇشىن وتە كۇردەلى كەزەڭ»، - دەدى مەملەكەت باسشىسى.

بۇعان قوسا ەلباسى قيىندىقتاردى شەشىپ، كەلىسىمگە كەلۋ ادامزات ءۇشىن ماڭىزدى ەكەنىن اتاپ ءوتتى.  

«وسى قيىندىقتارعا قاتىستى ماسەلەلەردى ءادىل جانە وبەكتيۆتى تۇردە تالقىلاۋدىڭ ءار مۇمكىندىگى ادامزات ءۇشىن وتە ماڭىزدى. سول سەبەپتى بيىلعى فورۋم جاھاندىق سىن-تەگەۋرىندەرگە ءتيىمدى جاۋاپ ىزدەۋگە باعىتتالعان. سايكەسىنشە، فورۋمدا وسى سالالارداعى بىلىكتى ماماندار جينالىپ وتىر. ولاردىڭ ءسوزىن تىڭداۋعا، ۇسىنىستارىن پايدالانۋعا ءبىز اسىعامىز»، - دەپ اتاپ ءوتتى پرەزيدەنت.

ايتا كەتەيىك، بۇگىن استانادا قازاقستان پرەزيدەنتى نۇرسۇلتان نازاربايەۆتىڭ قاتىسۋىمەن  Challenges Summit 2018 فورۋمىنىڭ جالپى وتىرىسى ءوتىپ جاتىر. فورۋم 17-19 مامىر كۇندەرى وتەدى. وندا الەمنىڭ ءتۇرلى ەلدەرىنەن 500-گە جۋىق سپيكەر قاتىستى.