بۇگىن 2018 جىلعى 17 مامىردا استانا ەكونوميكالىق فورۋمى الاڭىندا ەۋرازيالىق ەكونوميكالىق وداق پەن وعان مۇشە مەملەكەتتەر جانە يراننىڭ اراسىندا ەركىن ساۋدا ايماعىن قۇرۋعا اكەلەتىن ۋاقىتشا كەلىسىمگە قول قويىلدى، دەپ حابارلايدى Qamshy.kz اقپارات اگەنتتىگى. 

2016 جىلدان بەرى جۇرگىزىلىپ كەلە جاتقان كەلىسسوزدەردىڭ قورىتىندىسى بويىنشا، ەۋرازيالىق ەكونوميكالىق وداق پەن وعان مۇشە مەملەكەتتەر جانە يراننىڭ اراسىندا ءبىرقاتار بەكىتىلگەن تاۋارلارعا قاتىستى 3 جىل مەرزىمگە ءوزارا ساۋداداعى يمپورتتىق كەدەندىك باجدى تومەندەتۋ تۋرالى ۋاعدالاستىققا قول جەتكىزىلدى.   

يران قازاقستاندىق ونىمدەردىڭ ەكسپورتىن ۇلعايتۋداعى كەلەشەگى زور نارىق بولىپ تابىلادى. يرانمەن ءوزارا تاۋار اينالىمىنىڭ وڭ سەرپىنى بايقالادى، ول 2018 جىلعى 1 توقساندا 2017 جىلعى ۇقساس مەرزىممەن سالىستىرعاندا، 170 ملن. اقش دوللارىن قۇراي وتىرىپ، 70%-عا ءوستى.

بۇل كەلىسىم يراندىق نارىق باعىتىنا قول جەتكىزۋ تالابىن جاقسارتادى. كەلىسىم سيىر جانە قوي ەتى، نوقات، جاسىمىق، بۇرشاق، ارپا، جۇگەرى، وسىمدىك مايى، ماكاروندار، كونديتەرلىك ونىمدەر، بولات پروكاتى، رەلستەر، اككۋمۋلياتورلار، ارماتۋرا، قۇبىر جانە باسقا دا قازاقستاننىڭ ەكسپورتتىق مۇددەدەگى تاۋارلارىن يراننىڭ بۇگىندە باسقا ەلدەرگە ۇسىنىپ وتىرعان شارتتارىنا قاراعاندا، ەداۋىر جەڭىلدىكپەن جەتكىزۋگە مۇمكىندىك بەرەدى.   

مۇنىڭ سىرتىندا كەلىسىم يرانمەن ساۋدانىڭ تۇراقتى تالاپتارى مەن ەرەجەلەرىن قالىپتاستىرادى. كەلىسىم ەرەجەلەرى ساۋداداعى سانيتارلىق جانە فيتوسانيتارلىق شارالار مەن تەحنيكالىق بوگەتتەردى، ساۋدا راسىمدەرىن جەڭىلدەتۋگە باعىتتالعان تاۋارلاردىڭ شىققان ەلىن انىقتاۋدىڭ كەدەندىك راسىمدەرى مەن ەرەجەلەرىن قولدانۋدى رەتتەيدى جانە دسۇ مەن حالىقارالىق قۇقىق نورمالارىنا نەگىزدەلگەن.

ودان ارى تاراپتار دسۇ ەرەجەلەرىنە سايكەس ەركىن ساۋدا ايماعى تۋرالى تولىق فورماتتى كەلىسىمگە كوشۋدىڭ ماقساتقا سايكەستىگىن قاراستىرادى.

قازاقستان رەسپۋبليكاسىنىڭ اتىنان كەلىسىمگە قازاقستان رەسپۋبليكاسىنىڭ پرەمەر-مينيسترىنىڭ ءبىرىنشى ورىنباسارى ا.مامين قول قويدى.