شاردجاداعى Sheraton قوناقۇيىندە قازاقستاندىقتار جاپپاي ۋلانعان. تاڭعى اس ىشەمىز دەپ، جاعدايلارى كۇرت ناشارلاعان وتانداستارىمىز ەلگە قايتىپ ۇلگەردى. ولاردىڭ دەنى بالالار. دەمالۋعا بارىپ، دەرتكە شالدىعىپ قايتقان ازاماتتار بار شىعىندارىن قايتارىپ الۋعا بەكىندى.  

جاپا شەككەن ازاماتتاردىڭ ءبىرى اسىلبەك مۇحامبەتكەرەيەۆ وتباسىمەن بىرىككەن اراب امىرلىگىنە 8 مامىردا جولداما ارقىلى بارعان. كەلەسى كۇنى تاڭدا وتباسى مۇشەلەرىمەن تاڭعى اس ىشەدى. ەر ادامنىڭ ايتۋىنشا، ولاردىڭ ۋلانۋىنا سول تاڭعى استا جەگەن تاعامدارى سەبەپ بولعان. سول ۋاقىتتا قوناق ءۇيدىڭ ىشىندە 600-گە جۋىق تۋريست بولدى. ولاردىڭ جارتىسى – تمد ازاماتتارى.

العاشقى  بەلگىلەر 10 مامىردا تاڭعى ساعات 4-تەر شاماسىندا بايقالعان. العاش بولىپ رەسەيلىك وتباسى دارىگەر شاقىرتادى. دارىگەرلەر وتباسى مۇشەلەرىن تەكسەرىپ، قىزۋ قايتاراتىن ءدارى ەككەن. ال مۇحامبەتكەرەيەۆتىڭ وتباسى ساعات 10-دا بازار ارالاۋعا شىعادى، سول جەردە ۋلانۋدىڭ بەلگىلەرى بايقالا باستاعان. قوناقۇيگە بارعاندا ادامداردىڭ كوبىنىڭ جاعدايى ناشارلاعانىن بايقايدى. قازاقستاننىڭ 40-50 وتباسى، رەسەي، ۋكراينا، بەلارۋس ەلدەرىنىڭ 200-گە جۋىق وتباسى جاپپاي ۋلانعان ەكەن.

ۋلانۋدان زارداپ شەككەن اسەل جاراسقالي قىزىنىڭ ايتۋىنشا، دارىگەرلەر ۋلانعان كەي ناۋقاستارعا سالمونەللەز دياگنوزىن قويعان. ءوزى دە سول اۋرۋعا ششالدىققان كورىنەدى.

دەمالۋعا بارىپ، اۋىر دەرتكە شالدىققان وتانداستارىمىز تۋريستىك كومپانيالار مەن ساقتاندىرۋ مەكەمەلەرىنەن ساياحاتقا كەتكەن شىعىندارىن ءوندىرىپ الاتىنىن مالىمدەدى.

«ءبىر جىل بويى وسى دەمالىسقا اقشا جينادىق. ونىڭ ءبارىن قايتارىپ الامىز»، - دەپ كۇيىندى استانالىق اسىلبەك مۇحامبەتكەرەيەۆ.