18 مامىر – حالىقارالىق مۋزەي كۇنىنە وراي وتىرار مەملەكەتتىك ارحەولوگيالىق قورىق-مۋزەيىندە «مۋزەي – حالىق قازىناسى» اتتى تاريحي-تانىمدىق مەرەكەلىك شارا ءوتتى.
سان عاسىرلىق مۇرالاردىڭ كيەلى ورداسىنا اينالعان اتالعان مۋزەي ەلباسىمىز ن.نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىن جۇزەگە اسىرۋ، استانانىڭ 20 جىلدىعى جانە كاسىبي مەرەكەگە وراي «مۋزەي ءتۇنى» اتتى كەشكى مەرەكەلىك شارانى تۇڭعىش رەت ۇيىمداستىردى.
كورەرمەندەر ءۇشىن اشىقتىق جانە قول جەتىمدىلىك، ونەردى دارىپتەۋ جانە تانىمال ەتۋ، جاستاردىڭ نازارىن اۋدارۋ، ۇمىتىلماس مەرەكە ۇيىمداستىرۋ ماقساتىندا وتكىزىلگەن شاراعا اۋدان اكىمى ايتاحانوۆ ەرلان قۋانىش ۇلى قاتىسىپ، بارشا وتىرارلىقتار مەن مۋزەي قىزمەتكەرلەرىن ايتۋلى كۇنمەن قۇتتىقتادى.
«وتىرار - ءوزىنىڭ كونە تارتپاس تاريحي قۇندىلىقتارىمەن بۇكىل الەم عالىمدارىنىڭ، يۋنەسكو-نىڭ نازارىن وزىنە اۋدارعان، ۇلتتىڭ رۋحاني التىن قازىعى. «ۇلى وتىرار – قازاق وركەنيەتىنىڭ التىن دىڭگەگى» دەپ ەلباسىمىز بەكەرگە ايپاسا كەرەك. الەمدىك تاريحتا ءوز ورنى بار وتىراردىڭ مارتەبەسىن كوتەرۋ جولىندا ەڭبەك ەتىپ جاتقان سىزدەردىڭ ۇجىمدارىڭىزدى ءتول مەرەكەلەرىڭىزبەن شىن جۇرەكتەن قۇتتىقتايمىن!» دەپ، ىزگى تىلەگىن بىلدىرگەن اۋدان باسشىسى ە.ايتاحانوۆ ءبىرقاتار قىزمەتكەرلەرگە العىس حات پەن سىي-سياپاتىن تابىس ەتتى.
مەرەكەلىك شارادا مۋزەي كورەرمەندەرىنە «تاس ءداۋىرى – قاراحان ءداۋىرى» ەكسپوزيسيالىق بولىمىندە سول كەزەڭدەردىڭ ۇلگىسىمەن كيىنگەن تانىستىرۋشىلاردىڭ اڭگىمەلەرى ەرەكشە قالدىرسا، «وتىرار موڭعولداردىڭ كەزىندە»، «قۇمىراشى»، «كيىز ءۇي» بولىمدەرىندە قويىلعان تەاترلاندىرىلعان كورىنىستەر كونە زاماندى بەينەلەدى. ال الەم ۇستازى اتانعان ءابۋ ناسىر ءال فارابي - تەك وتىرارلىقتاردىڭ عانا ەمەس، كۇللى تۇركى الەمىنىڭ، قالا بەردى مۇسىلمان قاۋىمىنىڭ ماقتانىشى. مۋزەي تۇنىندە عۇلاما بابانىڭ تۋعان جەر تۋرالى تولعامى، عىلىم مەن ءبىلىم جايلى تولعانىستارى تاماشالاۋشىلاردى ايرىقشا تەبىرەنتتى.
سونىمەن قاتار، «قازاق حالقىنىڭ ءداستۇرلى مال شارۋاشىلىعى – ۇلتتىق كيىمدەر»، «اڭشىلىق، ساياتشىلىق، بالىق اۋلاۋ» سىندى ءبىرقاتار تانىستىرىلىمدار مەن مۋزەي قىزمەتكەرى نۇرسەيىت امزەنىڭ تاريحقا بايلانىستى قويعان ۆيكتورينالىق سۇراقتارى رۋحانيات الەمىن بويعا تەرەڭ سىڭىرۋگە اسەر ەتتى.
عاسىرلار تەرەڭىنەن سىر تارتقان ولكە تاريحىمەن جەتە تانىسۋعا شاقىرعان «مۋزەي ءتۇنى» مادەني شاراسى اۋىزاشارعا ۇلاستى.
