مامىردىڭ 17-سىنەن 18-ىنە قاراعان ءتۇنى اقتوبەدە ليەۆون ميرزويان ەسكەرتكىشى الىنىپ تاستالدى. اقتوبە قالاسىنىڭ باس ساۋلەتشىسى تاڭات شەگەبايەۆ «يدەولوگيالىق تۇرعىدان ەسكىرگەن ەسكەرتكىشتىڭ مۇلدەم جويىلمايتىنىن، تەك ورنى اۋىسقانىن» ايتادى. بۇل تۋرالى ازاتتىق حابارلادى.

باس ساۋلەتشىنىڭ ايتۋىنشا، تۇڭعىش پرەزيدەنت اتىنداعى ورتالىق ساياباقتىڭ ءبىر بۇرىشىندا تاريحي زونا جاسالماقشى. يدەولوگيالىق تۇرعىدان ەسكىرگەن ەسكەرتكىشتەر – لەنين، فرۋنزە، ميرزويان ەسكەرتكىشتەرى سول جەرگە اۋىستىرىلادى.

ەسكەرتكىش بۇرىنعى ميرزويان كوشەسىنىڭ بويىندا 1997 جىلدان بەرى تۇرعان.

سوۆەت ۇكىمەتى تۇسىندا قازاقستاندى باسقارىپ، اشسا الاقانىندا، جۇمسا جۇدىرىعىندا ۇستاعان ميرزوياننىڭ ەسكەرتكىشتەرىن الىپ تاستاپ، قازاقستان قالالارىنداعى ميرزويان اتىنداعى كوشەلەردىڭ اتىن اۋىستىرۋدى قوعام بەلسەندىلەرى بىرنەشە جىلدان بەرى تالاپ ەتىپ كەلەدى. وسىعان وراي ساۋىردە اقتوبەدەگى ءدال وسى ەسكەرتكىش تۇرعان ليەۆون ميرزويان كوشەسىنىڭ اتى اۋىستىرىلىپ، ءاليحان بوكەيحان ەسىمى بەرىلگەن. 2015 جىلى استانا قالاسىنداعى ليەۆون ميرزويان كوشەسىنە قانىش ساتبايەۆتىڭ اتى بەرىلگەن. ال قوعام بەلسەندىلەرى قانشا شۋلاسقانىمەن ناتيجە شىقپاعان الماتى قالاسىندا ميرزويان اتىنداعى كوشە ءالى بار.