17 مامىردا ق ر اقپارات جانە كوممۋنيكاسيالار ءمينيسترى داۋرەن اسكەربەك ۇلى ابايەۆ «كەيكى مەرگەن» تەلەحيكاياسىنىڭ شىعارماشىلىق توبىمەن كەزدەستى. بۇل تۋرالى «قازاقستان» تەلەراديوكورپوراسياسىنىڭ باسشىسى ەرلان قارين Facebook-تەگى پاراقشاسىندا حابارلادى، دەپ جازادى Qamshy.kz اقپارات اگەنتتىگى.
«كەزدەسۋدە تەلەحيكايانىڭ باستى رەجيسسەرى مۇرات بيدوسوۆ سەنارييدىڭ العاشقى نۇسقاسىمەن، تەلەxيكايانىڭ ءتۇسىرىلىم جوسپارىمەن، كاستينگ ناتيجەلەرىمەن تانىستىرىپ ءوتتى. سونداي-اق، تۋىندىنىڭ تاريحي كەڭەسشىسى بەرىك ابدىعاليمەن بىرگە تەلەحيكايانىڭ سەنارييىن جان-جاقتى تالقىلاپ، وي-پىكىرلەرىمەن ءبولىستى. "Qazaqstan” تەلەراديوكورپوراسياسىنىڭ تاپسىرىسىمەن دايىندالىپ جاتقان بۇل تۋىندى كەيكى باتىردىڭ ءومىرى مەن مەرگەندىگىن سۋرەتتەيتىن، ءبىر عاسىر بۇرىنعى وقيعالاردى، قازاق حالقىنىڭ سول كەزدەگى جاعدايىن باياندايتىن تەلەxيكايا بولماق. كەزدەسۋ ناتيجەسىندە، داۋرەن اسكەربەك ۇلى ءوز تاراپىنان سەناريي بويىنشا ەسكەرتۋ مەن ۇسىنىستارىن ايتىپ، شىعارماشىلىق توپقا ساتتىلىك تىلەدى»، - دەپ جازدى ەرلان قارين.
بۇدان بۇرىن «قازاقستان» تەلەراديوكورپوراسياسى جانىنان قۇرىلعان كوركەم تەلەحيكايالاردى ىرىكتەۋ جونىندەگى ساراپشىلار كەڭەسى كەيكى باتىر تۋرالى تۋىندى يدەياسىن ماقۇلداعان بولاتىن. «كەيكى مەرگەن» تەلەحيكاياسى بويىنشا كەيكى باتىردىڭ ءومىر سۇرگەن ورتاسى تۋرالى زەرتتەۋلەر جاساپ جۇرگەن ءشوپتىباي ءبايدىلدين مەن تاريحشى بەرىك ءابدىعالي تەلەحيكاياعا بايلانىستى وي-ۇسىنىستارىن ايتىپ، تەلەحيكايا رەجيسسەرى مۇرات بيدوسوۆ ۇسىنعان سەنارييدىڭ العاشقى نۇسقاسى تالقىلانعان.
كەيكى (نۇرماعانبەت) كوكەمباي ۇلى (1871-1923) - 1916 جىلعى تورعايدا بولعان ۇلت-ازاتتىق كوتەرىلىسىنىڭ باتىرى، اتاقتى مەرگەن. ورتا ءجۇز قۇرامىنداعى قىپشاق تايپاسىنىڭ قۇلانقىپشاق رۋىنان شىققان. قوستاناي وبلىسى امانكەلدى اۋدانىنىڭ بايتۋما قوپاسىندا دۇنيەگە كەلگەن. جاستايىنان اڭشى، مەرگەندىگىمەن، وجەتتىگىمەن ايماققا تانىلعان. ونىڭ قۇرالايدى كوزگە اتقان مەرگەندىگىنە ساي ەل اۋىزىندا «امانگەلدىنىڭ كوزى مەرگەن، كەيكىنىڭ قولى مەرگەن» دەگەن سيپاتتاما ساقتالعان.
كەيكى باتىردىڭ ادەبيەتتەگى بەينەسى عابيت مۇسىرەپوۆتىڭ «امانگەلدى» پەساسىندا كەتە باتىر بولىپ بەينەلەنەدى. ماقان جۇماعۇلوۆتىڭ «قىران قازاسى قيادا» كىتابىندا جۇمباقتالىپ ايتىلادى. كەيكىنىڭ قاراسوزدە جاسالعان كوركەم بەينەسى اقان نۇرمانوۆتىڭ «قۇلاننىڭ اجالى» اتتى رومانى ەدى. الايدا كەڭەس زامانىندا شىققان وندا دا اتى انىق ايتىلماعان.
كەيكى بەينەسى ءوز اتىمەن انىق ايتىلىپ، قانىق بوياۋ دەرەگىمەن تۇگەلدەنىپ شىققان شىعارما سەرىك تۇرعىنبەك ۇلىنىڭ «كەيكى باتىر» تاريحي داستانى (الماتى، «ءبىلىم»، 2001). كەيكى باتىر كوكەمباي ۇلىنىڭ ۇرپاقتارى قوستاناي وبلىسىنىڭ امانگەلدى اۋدانىنداعى اقتاس، تاستى ەلدى مەكەندەرىندە تۇرادى. 1996 جىلى كەيكى باتىردىڭ 125 جىل تولۋىنا بايلانىستى اس بەرىلىپ، ەسكەرتكىش ورناتىلدى.
