22، 23 مامىرا بىشكەك قالاسىندا ق ر ءدىن ىستەرى جانە ازاماتتىق قوعام مينيسترلىگى جاستار ساياساتى دەپارتامەنتىنىڭ ديرەكتورى اسحات ورالوۆ باستاعان قازاقستاندىق دەلەگاسيا ورتالىق ازيا ەلدەرى جاستارىنىڭ فورۋمىنا قاتىستى، دەپ حابارلايدى Qamshy.kz اقپارات اگەنتتىگى. 

دەلەگاسيا قۇرامىندا «جاستار» عىلىمي-زەرتتەۋ ورتالىعىنىڭ ديرەكتورى ت. قالييەۆ، قازاقستان ستۋدەنتتەرى اليانسىنىڭ ءتوراعاسى ءى. تۇستىكبايەۆ، جاستار ىسكەرلىك كەڭەسىنىڭ جەتەكشىسى ق. ساحمەتوۆ بار.

فورۋم جۇمىسىنا ورتالىق ازيا ەلدەرىنىڭ، اتاپ ايتقاندا، تاجىكستان، تۇركمەنستان، وزبەكستان، كىرعىزستان، قازاقستاننىڭ جاستار ساياساتى سالاسىنداعى مەملەكەتتىك ورگانداردىڭ وكىلدەرى مەن جاستار ۇيىمدارىنىڭ باسشىلارى قاتىستى.

فورۋم قاتىسۋشىلارى بۇۇ قاۋىپسىزدىك كەڭەسىنىڭ «جاستار، بەيبىتشىلىك جانە قاۋىپسىزدىك» 2250 رەزوليۋسياسىن جانە بەيبىتشىلىكتى تۇراقتى ساقتاۋداعى جاستاردىڭ ءرولىن كۇشەيتۋ ماسەلەلەرىن تالقىلادى. 

جاستار ساياساتى دەپارتامەنتىنىڭ ديرەكتورى ا. ورالوۆ ءوز بايانداماسىندا فورۋم قاتىسۋشىلارىن قازاقستانداعى مەملەكەتتىك جاستار ساياساتىنىڭ جۇزەگە اسىرىلۋ بارىسىمەن تانىستىردى.

«جاستارمەن جۇيەلى جۇمىس «مەملەكەتتىك جاستار ساياساتىنىڭ 2020 جىلعا دەيىنگى تۇجىرىمداماسى» نەگىزىندە جۇزەگە اسىرىلۋدا. مينيسترلىك جانىندا «جاستار» عىلىمي-زەرتتەۋ ورتالىعى قىزمەت ەتەدى. بارلىق وڭىرلەردە جاستارمەن ادرەستى جۇمىستى جۇرگىزۋ ماقساتىندا 208 جاستار رەسۋرستىق ورتالىقتارى جۇمىس ىستەۋدە. 500 استام جاستار ۇەۇ بەلسەندى قىزمەت ەتۋدە. مينيسترلىكتىڭ باستاماسىمەن ءار وڭىردە جاستاردىڭ بوس ۋاقىتىن ۇيىمداستىرۋ بويىنشا 2020 جىلعا دەيىنگى جوسپارلاردىڭ جۇزەگە اسىرىلۋى باستالدى. وندا جاستار ينفراقۇرىلىمىن دامىتۋ جانە مەملەكەتتىك-جەكەمەنشىك ارىپتەستىكتى تارتۋعا اسا كوڭىل بولىنگەن»، - دەدى ا. ورالوۆ.     

اسحات ورالوۆ جاستاردىڭ مۇمكىندىكتەرىن كەڭەيتۋگە باعىتتالعان الەۋمەتتىك جوبالاردى دامىتۋدا جاستاردىڭ مارگينالدانۋىنىڭ الدىن الۋ جانە ولاردى الەۋمەتتەندىرۋگە باعىتتالعان ءىس-شارالاردىڭ ماڭىزدىلىعىن اتادى.  

سونىمەن قاتار، ا. ورالوۆ ورتالىق ازيا ەلدەرىنىڭ وكىلدەرىن اعىمداعى جىلى قازان ايىندا استانا قالاسىندا وتەتىن «جاستارعا ينۆەستيسيا» حالىقارالىق كونفەرەنسياسىنا شاقىردى.

فورۋم قورىتىندىسى بويىنشا ۇسىنىمدار قابىلدانىپ، ورتالىق ازيا ەلدەرىندە بۇۇ قاۋىپسىزدىك كەڭەسىنىڭ 2250 رەزوليۋسياسىن جۇزەگە اسىرۋعا ارنالعان ءىس-قيمىل جوسپارى ازىرلەندى.