وبلىس اكىمى قۇمار اقساقالوۆ كانن كينوفەستيۆالىندە توپ جارعان جەرلەس اكتريسا سامال ەسلاموۆامەن كەزدەستى، دەپ حابارلايدى Qamshy.kz اقپارات اگەنتتىگى.
كەزدەسۋگە سامالدىڭ اتا-اناسى ءىلياس جانە گۇلمايرا ەسلاموۆتەر، سامالدىڭ العاشقى سىنىپ جەتەكشىسى زۋحرا ابۋ قىزى جانە سامال جۇمىس ىستەگەن ءسابيت مۇقانوۆ اتىنداعى سازدى-دراما تەاترىنىڭ اكتەرلەرى، سونداي-اق ونەر كوللەدجىنىڭ وقىتۋشىلارى مەن ستۋدەنتتەرى قاتىستى.
ءوڭىر باسشىسى وسى كۇنگە دەيىن قازاقستاننىڭ جانە ءتىپتى تمد ەلدەرىنىڭ اكتريسالارى وسى اتاققا قول جەتكىزە الماعاندىعىن باسا ايتتى. قۇمار اقساقالوۆ ايگىلى اكتەرلەر مەن اكتريسالاردىڭ رۋحاني الەمى تۋعان جەرىمەن مىقتى بايلانىستا دەيدى.
«الەمدەگى ەڭ تانىمال كينوفەستيۆالگە قاتىسىپ، توپ جارىپ، جەتىستىككە جەتۋ قازاقستاندا عانا ەمەس، تمد ەلدەرىندە بولماعان جاعداي. قازاقتىڭ اتىن، رۋحىن كوتەرگەنىڭ ءۇشىن سامالعا العىسىمىز شەكسىز. قاراپايىم اۋىلدان شىعىپ، وسىنداي جەتىستىككە سامال ءوزىنىڭ دارىندىلىعىنىڭ ارقاسىندا قول جەتكىزدى. كوپ ادامدار ايگىلى اكتەرلەر ۇلكەن قالالاردا تۋادى دەپ ويلايدى. شىن مانىندە، ناعىز اكتەرلەر مەن اكتريسالار شاعىن اۋىلداردان شىعادى. ادامنىڭ ىشكى رۋحاني الەمى اتا-جۇرتىنان، تۋعان جەرىنەن، تاريحىنان ءنار الادى. سامالدىڭ جەتىستىگى وسىعان دالەل»،- دەدى قۇمار اقساقالوۆ.
سامال ەسلاموۆا ءدۇيىم جۇرتقا قۇتتىقتاۋلار مەن قولداۋلارى ءۇشىن العىسىن جەتكىزدى.
«ەلگە كەلىپ، جەرلەستەرىمدى كورۋ مەن ءۇشىن قۋانىش. مەنى قولداپ، قۇتتىقتاپ جاتقاندارىڭىز ءۇشىن كوپ العىس ايتامىن»، - دەدى سامال ەسلاموۆا.
كەزدەسۋدە سامالدىڭ اتا-اناسى ءسوز سويلەپ، قىزدارىنىڭ ۇلكەن جەتىستىگىنە جىلى تىلەكتەرىن ءبىلدىرىپ جاتقان سولتۇستىكقازاقستاندىق جاماعاتقا العىستارىن جەتكىزدى.
كەزدەسۋ سوڭىنا ماراپاتتاۋ ءراسىمى ءوتتى. قۇمار اقساقالوۆ سامال ەسلاموۆاعا 3 بولمەلى پاتەردىڭ كىلتىن تابىس ەتتى. اكتريسا وبلىس اكىمىنىڭ قۇرمەت گراموتاسىنا دا يە بولدى. ءىلياس جانە گۇلمايرا ەسلاموۆتەر وبلىس اكىمىنىڭ العىس حاتىمەن ماراپاتتالدى.
پىكىر قالدىرۋ