Facebook الەۋمەتتىك جەلىسىندە 10 مامىردا ساياسي تۇتقىنداردى ازات ەتۋگە ارنالعان ميتينگىگە شىققان ەر ازامات ۋچاسكەلىك پوليسەيدىڭ سوڭىنا تۇسكەنىن ايتىپ ۆيدەو جاريالادى.

ەر ادامنىڭ ايتۋىنشا، ول ميتينگىگە تۇرمەدەگى جازاسىن وتەۋشىلەردى زورلىق-زومبىلىق كورسەتىلمەۋىن تالاپ ەتىپ شىققان. نارازىلىق اكسياسىنا شىققانداردى شىمكەنت قالاسى قاراتاۋ اۋداندىق ىشكى ىستەر دەپارتامەنتىنە اپارعان. وندا ونىڭ قولىنا تۇسىنىكتەمە حاتىن ۇستاتىپ، كەلەسى جولى ميتينگىگە شىعۋ ءۇشىن اكىمدىكتەن رۇقسات قاعازىن الۋ كەرەك ەكەنىن ايتقان.

ەر ادامنىڭ ايتۋىنشا، تولەبايەۆ باقىتجان يسلاموۆيچ ەسىمدى ۋچاسكەلىك پوليسەي ونىڭ سوڭىنان تۇسكەن.

«دۇكەنىمىز بار. سوعان جاقىن ماڭداعى جەردە پاتەردە تۇردىق. تولەبايەۆ باقىتجان يسلاموۆيچ ەسىمدى ۋچاسكەلىك پوليسەي ءۇي يەسىنە بارىپ، "ءبىزدى پاتەردەن شىعارماساڭ 50 مىڭ تەڭگە ايىپپۇل سالامىز" دەپ قورقىتىپ، ۇركىتكەن. ودان كەيىن دۇكەنىمىزگە كەلىپ كەلىنشەگىمدى قورقىتقان. اكىمدىك، سالىق كوميتەتىنەن، سەس-تەن ادامدار كەلىپ جاتىر. جان-جاعىمىزدا قانشا دۇكەن بار، پاتەردە تۇرىپ جاتقان ادامدار بار، ەشقايسىسىن ءدال بىزدىكىندەي تەكسەرىپ جاتقان جوق»، - دەيدى ەر ادام.

ۆيدەو اۆتورى دۇكەندى قاتاڭ تەكسەرىپ جاتقانى دا ۋچاسكەلىك پوليسەيدىڭ ىقپالىمەن بولىپ جاتقانىنا سەنىمدى. 

«مەن ۋچاسكەلىك پوليسەي باقىتجانعا بارىپ «نەگە ءۇيتتىڭ دەسەم. بىلگەنىڭدى ىستە» دەپ شىعارىپ سالدى... مەنىڭ داۋىسىم جوعارىداعىلارعا جەتسە ەكەن» دەيدى ول.

ەر ادام بالا-شاعاسىمەن 16 مامىردا پاتەردەن شىعۋعا ءماجبۇر بولعان. ۆيدەودا ول 5 بالاسى بار ەكەنىن ايتادى. ۇلكەنى 10-دا، كىشىسى 5-تە. پاتەردەن شىعارىلعاننان كەيىن دۇكەنگە كوشىپ كەلگەن. ۆيدەودان بالالارىنىڭ دۇكەن قويماسىنداعى بەتون ەدەندە ۇيىقتاپ جاتقانىن كورۋگە بولادى.

زاڭگەرلەردىڭ ايتۋىنشا، ۋچاسكەلىك پوليسەي تولەبايەۆ باقىتجان ءيسلاموۆيچتىڭ پاتەر يەسىنە بارىپ ەر ادامدى بالا-شاعاسىمەن ۇيدەن شىعارۋىن تالاپ ەتۋى زاڭسىز. بۇل ءوز قىزمەتىن اسىرا پايدالانۋ ەكەنىن ايتادى. زاڭگەر ۆيدەو اۆتورىنا ۋچاسكەلىك پوليسەيدىڭ تىكەلەي باسشىسىنا بارىپ شاعىمدانۋعا كەڭەس بەرەدى. ەگەر ودان ەشقانداي ناتيجە شىقپاسا پروكۋراتۋراعا ارىز ءتۇسىرۋ كەرەك ەكەنىن ايتادى.  ال دۇكەندى تەكسەرۋ زاڭدى ەكەنىن جەتكىزدى. 

شىمكەنت قالاسى قاراتاۋ اۋداندىق ىشكى ىستەر باسقارماسىنا حابارلاسىپ ەدىك، قاراتاۋ اۋداندىق ءىىب باسشىسى نۇرعالي سەلتانوۆ ەسىمدى كەزەكشى پوليسەي ارقىلى اتالعان جاعدايعا قاتىستى كوممەنتاريي بەرمەيتىنىن جەتكىزدى. باسقارما باسشىسى بىزبەن تىكەلەي بايلانىسقا شىقپادى.