2018  جىلدىڭ 22-24 مامىر كۇندەرى الماتى قالاسىندا «ەۆوليۋسيانىڭ 15 جىلى: الەم وزگەرىسى مەن ءبىزدى وزگەرتۋى» تاقىرىبىندا  وتكەن XV ەۋرازيالىق مەديا فورۋمى ءوز جۇمىسىن اياقتادى، دەپ حابارلايدى Qamshy.kz اقپارات اگەنتتىگى فورۋمنىڭ باسپا ءسوز ورتالىعىنا سىلتەمە جاساپ.

 جالپى ءۇش كۇنگە سوزىلعان فورۋم 60-تان استام ەلدەن 500-دەن اسا دەلەگاتتاردى جينادى. الەمدىك ساراپشىلار فورۋمعا وڭ پىكىرىن ءبىلدىرىپ، ورتالىق ازياداعى تاۋەلسىز ديالوگ الاڭى دەگەن باعا بەردى.

بۇل رەتتە فورۋم ءوز ميسسياسىن تولىعىمەن ورىندادى دەپ ايتۋعا نەگىز بار. سەبەبى،  قازاقستاننىڭ، ەۋرازيانىڭ، ءتىپتى بۇكىل الەمدىك قاۋىمداستىقتىڭ ەكونوميكالىق، گەوساياسي، الەۋمەتتىك مادەني ماسەلەلەرى وسى فورۋم الاڭىندا تالقىلاندى.    

فورۋمنىڭ جابىلۋ سالتاناتى داريعا نۇرسۇلتان قىزىنىڭ قورىتىندى سوزىمەن اياقتالدى. ول وسى ءۇش كۇندى قازىرگى مەديانىڭ كوكەيكەستى ماسەلەلەرىنە قاتىستى قىزىقتى  پىكىرتالاس جانە تالقىلاۋمەن ەستە قالاتىنىن جەتكىزدى. سونىمەن قاتار، ون بەسىنشى فورۋمنىڭ ەرەكشىلىگىنە توقتالىپ ءوتتى.

«ءبىز سوڭعى ون بەس جىلدا بۇقارالىق اقپارات قۇرالدارى باستان كەشكەن وزگەرىستەردى باعالاۋعا، وي ەلەگىنەن وتكىزۋگە تىرىستىق. وزگەرىستەر تۇبەگەيلى. فورۋمداعى پىكىرتالاس وسى تۇجىرىمدى دالەلدەپ بەردى. سونداي-اق، ون بەسىنشى مەرەيتويلىق ەۋرازيا مەديا فورۋمى ءبىزدىڭ باستى جەتىستىگىمىز، ءبىزدىڭ باستى قۇندىلىعىمىز – سىزدەر، فورۋمعا قاتىسۋشىلار، سپيكەرلەر مەن مودەراتورلار»، - دەدى ول ءوز سوزىندە.

ءىس-شارانىڭ باس سەرىكتەسى «سامۇرىق-قازىنا» ۇلتتىق ءال-اۋقات قورى» اكسيونەرلىك قوعامىنا، بارلىق شەتەلدىك جانە وتاندىق ب ا ق وكىلدەرىنە، سپيكەرلەر مەن ۇيىمداستىرۋشىلارعا، سونداي-اق ەرىكتىلەرگە العىسىن ايتىپ، ءسوزىن ءتامامدادى.