جۋىردا سايراگۇل ساۋىتباي اتتى قانداسىمىزدى قىتايعا كۇشتەپ قايتارعالى جاتىر دەگەن اقپارات تارادى. ءوزىن سايراگۇلدىڭ قاينىسىمىن دەپ تانىستىرعان ەر ادام ۆيدەوۇندەۋ جاساپ، ەل-جۇرتتان كومەك سۇرادى.

بۇل وقيعاعا بۇكىل قازاق الاڭدادى. الەۋمەتتىك جەلىدە سايراگۇل ساۋىتبايعا اراشا سۇراعاندار كوپ بولدى. وسىعان بايلانىستى Qamshy.kz اقپارات اگەنتتىگى ق ر ۇقك شەكارا قىزمەتىنە رەسمي ساۋال جولداعان ەدى. قۇزىرلى مەكەمەدەن تومەندەگىدەي جاۋاپ كەلدى.

"قىتايدىڭ قۇقىق قورعاۋ ورىندارى 1976 جىلى تۋعان قحر ازاماتى سايراگۇل ساۋىتبايعا ىزدەۋ سالعان ەدى. ول "قورعاس" شىحو-نىڭ قىتايلىق بولىگىنە قحر جاقتان جەكە كۋالىك پەن ءبىر رەتتىك رۇقساتناما ارقىلى كىرىپ، قىتايعا قايتىپ ورالماعان.

سايراگۇل ساۋىتبايدىڭ ق ر اۋماعىنا كىرەتىن زاڭدى قۇقىعى بولماعان. سەبەبى ونىڭ قكپ مۇشەلەرىنە شەتەلگە شىعۋعا مۇمكىندىك بەرەتىن ءتولقۇجاتى تارتىپ الىنعان (بالاباقشا مەڭگەرۋشىسى بولىپ جۇمىس ىستەگەن).

ءساۋىر ايىندا قىتايدىڭ شەكارا قىزمەتىندەگى جەمقور شەنەۋنىكتەردىڭ كومەگىمەن "قورعاس" شىحو-عا كىرەتىن جالعان رۇقساتناما جاساپ الىپ، شەكارانى زاڭسىز كەسىپ وتكەن.

ق ر ۇقك شەكارا قىزمەتىنىڭ وكىلدەرى ونىڭ كۇيەۋىمەن بىرگە بايدىبەك بي اۋىلىندا تۇرىپ جاتقانىن انىقتادى. قحر-دان قر-عا مەملەكەتتىك شەكارانى زاڭسىز كەسىپ ءوتۋ فاكتىسى بويىنشا قىلمىستىق ءىس قوزعالدى".

ارينە، قانى ءبىر قازاق ازاماتىنىڭ اتاجۇرتىندا تۇراقتاي الماي، وتباسىنان جىراققا كەتىپ بارا جاتقانى ءبارىمىزدى قىنجىلتادى. الايدا قازاقستان رەسپۋبليكاسىنىڭ زاڭى بار، قىتايمەن ەكى اراداعى كەلىسىم بار. بالا-شاعاسىنا اسىعىپ، انالىق جۇرەگىنىڭ امىرىمەن زاڭ بۇزعان سايراگۇلدىڭ جاعدايى جانىمىزعا باتادى. ەلىمىزدىڭ قۇزىرلى ورىندارى شەكارانىڭ ەكى جاعىندا قالعان قازاقتاردىڭ جانايقايىنا قۇلاق اسىپ، حالىقارالىق نورمالارعا جۇگىنە وتىرىپ، كۇرمەۋى قيىن كۇردەلى ماسەلەنى ساتىمەن شەشەدى دەپ سەنەمىز.