قازاقستان رەسپۋبليكاسى دەنساۋلىق ساقتاۋ مينيسترلىگىنىڭ قوعامدىق دەنساۋلىق ساقتاۋ كوميتەتىنىڭ ءتوراعاسى - قازاقستان رەسپۋبليكاسىنىڭ باس مەملەكەتتىك سانيتاريالىق دارىگەرى جانداربەك بەكشين الماتىدا مەنينگوكوكتان قايتىس بولۋ وقيعالارىنا قاتىستى تۇسىنىك بەردى، - دەپ حابارلايدى Tengrinews.kz.

"مەنينگيتتى قوزدىراتىن neisseria meningitidis ءاردايىم كوپشىلىك ورىندا تارالادى، ال قازىرگى تۇراقسىز اۋا رايى، سالقىن كۇندەر باكتەريانىڭ تارالۋىنا سەبەپشى بولىپ وتىر. (...) ءبىز الماتىداعى ەپيدەميولوگيالىق اۋرۋدى تىركەپ وتىرمىز. بۇل - ماۋسىمدىق اۋرۋ. ول كوبىنەسە سۋىق كەزدەردە بولادى، كوكتەمدە، يممۋنيتەت ءالسىز كەزدە. الماتىداعى اۋرۋ-سىرقاۋ تولقىن ءتارىزدى سيكلدىك سيپاتقا يە بولىپ تۇر"، - دەدى بەكشين جۋرناليستەردىڭ سۇراقتارىنا جاۋاپ بەرىپ.

ونىڭ ايتۋىنشا، 2013 جىلى 49 وقيعا تىركەلگەن، 2015 - 66 وقيعا، ال ەڭ كوپ تىركەلگەن جىل 2011 بولدى، ول كەزدە استانا قالاسىندا 211 ادام اۋىرعان.

"قازىرگى تاڭدا الماتىدا مەنينگيتكە شالدىعۋدىڭ 29 وقيعاسى تىركەلدى جانە ولار زەرتحانالىق نەگىزدە راستالعان. ءقازىر ءبىز ەپيدەمياعا قارسى شارالاردى جۇرگىزىپ جاتىرمىز - مادەني-كوپشىلىك شارالارعا شەكتەۋ قويدىق، اسىرەسە جابىق عيماراتتاردا. بۇگىنگى تاڭدا مەكتەپتەردەگى ساباق اياقتالدى، ول دا جاعىمدى اسەر ەتەدى. باكتەريالار ءۇشىن ەڭ ءقاۋىپتى نارسە - كۇننىڭ ساۋلەسى جانە ءبىز كۇن ىسىعاننان كەيىن اۋرۋدىڭ بەتى قايتادى دەپ ويلاپ وتىرمىز. سونىمەن قاتار، بالاباقشالاردا پروفيلاكتيكالىق شارالاردى جۇرگىزىپ جاتىرمىز - فيلترلەر ورناتتىق"، - دەدى باس دارىگەر.

بەكشيننىڭ ايتۋىنشا، سۋىق تيگەن جاعدايدا بىردەن ەمدەلىپ، پروفيلاكتيكا جاساۋ قاجەت.

"مۇنداي جاعدايدا عيماراتتىڭ ىشىندەگى اۋانى تازارتىپ، دەزينفەكسيالىق زاتتاردىڭ كومەگىمەن ىلعالدى تازالىق جۇمىسىن جۇرگىزۋگە كەڭەس بەرەمىز. بۇل سانيتارلىق-ەپيدەمياعا قارسى شارالار اۋرۋ-سىرقاۋدى رەتتەۋگە جول بەرەدى. ەڭ باستىسى، نازوفارەنگيت، سۋىق تيۋ بەلگىلەرى بار ناۋقاستار بىردەن مەديسينالىق قىزمەتكەرلەرگە بارۋى كەرەك. دەرتتەن قايتىس بولعانداردىڭ بارلىعى دارىگەرلەرگە كەش بارعاندار"، - دەدى بەكشين.

ەسكە سالا كەتەيىك، 21 مامىردا بۇل دەرت 15 ادامدا انىقتالعان ەدى. جالپى ءۇش ادام قايتىس بولدى - ەكى ەرەسەك ادام مەن ءبىر بالا. كەيىن الماتىدا مەنينگوكوك ينفەكسياسىنان 1-كۋرس ستۋدەنتىنىڭ قايتىس بولعانى انىقتالدى.

مەنينگوكوكك ينفەكسياسى - ينفەكسيالىق جۇقپالى اۋرۋ، ول ءتۇرلى كلينيكالىق بەلگىلەرمەن باكتەريالار ارقىلى پايدا بولادى - تاراتۋشىدا بەلگىلەرى بىلىنبەيتىن بولۋى دا مۇمكىن نەمەسە نازوفارينگيتتەن (مۇرىن-جۇتقىنشاق قابىنۋى)، مەنينگيتتەن (مي قابىعىنىڭ قابىنۋى) بولۋى مۇمكىن. ينفەكسيانىڭ كوزى - اۋرۋ ادامدار جانە دەنى ساۋ تاراتۋشىلار.