جۇڭگو ازاماتتارىنا قازاقستانعا ۆيزاسىز كىرۋگە رۇقسات بەرىلگەنىنە حالىق نارازىلىق ءبىلدىرىپ، جەلىدە قىزۋ تالقىلاپ جاتىر. قحر  ازاماتتارىنا ۆيزاسىز رەجيم قاي ۋاقىتقا دەيىن جارامدى جانە ولار قانداي شارتپەن ۆيزاسىز كىرە الادى؟ ۆيزاسىز رەجيم ەنگىزۋدىڭ استارىندا نە بار؟ Qamshy.kz اقپارات اگەنتتىگى وسى سۇراقتاردىڭ جاۋابىن ىزدەپ كوردى.

ق ر ۇكىمەتىنىڭ №814 قاۋلىسىمەن استانا، الماتى ارقىلى قحر ازاماتتارىنا ارنالعان 72 ساعاتتىق ترانزيتتىك ۆيزاسىز رەجيم ەنگىزىلدى. بۇل رەجيم 2018 جىلدىڭ 31 جەلتوقسانىنا دەيىن جارامدى. قاۋلىعا ق ر پرەمەر-مينيسترى باقىتجان ساعىنتايەۆ قول قويعان.

ترانزيتتىك ۆيزا تەك قازاقستاننان باسقا ەلگە بيلەتى بار ازاماتتارعا بەرىلەدى، ياعني ەلگە كەلگەن ازاماتتىڭ قازاقستاننان ارى قاراي باسقا قالاعا (مەملەكەتكە) ۇشاتىن بيلەتى بولۋى قاجەت. وسى جاعدايدا عانا ولار قازاقستانعا ۆيزاسىز كىرگىزىلەدى. ايتپەسە ترانزيتتىك ۆيزا بەرىلمەيدى.

72 ساعاتتىق ترانزيتتىك ۆيزاسىز رەجيم بىلتىر ەكسپو قارساڭىندا ەنگىزىلگەن. ق ر مادەنيەت جانە سپورت ءمينيسترى ارىستانبەك مۇحامەدي ۇلى ۆيزاسىز رەجيم قازاقستاننىڭ تۋريستىك سالاسىنىڭ دامۋىنا جانە قىتايمەن اراداعى ستراتەگيالىق قارىم-قاتىناستى نىعايتۋعا ىقپال ەتەتىنىن ايتادى.

«ەكسپو الدىندا پيلوتتىق رەجيمدە ەنگىزىلگەن ترانزيتتىك ۆيزاسىز رەجيم ءقاۋىپسىز ەكەنىن كورسەتتى. ءۇش ايدىڭ ىشىندە قىتايدان ەلگە كەلگەن 4 500 ءتۋريستىڭ ءارقايسىسى ەل ەكونوميكاسىنا 250-300 اقش دوللارىن قالدىردى»، — دەگەن بولاتىن ارىستانبەك مۇxامەدي ۇلى.

ق ر ۇقك شەكارا قىزمەتى قازاقستاننىڭ شەكاراسىنداعى وتكىزۋ پۋنكتەرىندە 72 ساعاتتىق ۆيزاسىز رەجيمدى قولداناتىن شەتەلدىكتەردى تىركەيدى. ولارعا ميگراسيالىق كارتوچكالار بەرىلەدى. وندا قازاقستاننىڭ شەكاراسىنان وتكەن ۋاقىتى كورسەتىلەدى.

ۆيزاسىز رەجيمدى قولداناتىن شەتەلدىكتەر استانا مەن الماتى حالىقارالىق اۋەجايىنا كەلمەس بۇرىن قازاقستانىڭ اۋە كومپانيالارى ولاردىڭ ءتىزىمىن ۇقق شەكارا قىزمەتىنە جانە ىشكى ىستەر مينيسترلىگىنە بەرەدى.

ەگەر جۇڭگو ازاماتتارى ۆيزاسىز رەجيمدى بۇزسا، ولاردى ءوز اقشالارىنا قازاقستاننان شىعارادى. ال قارجىسى بولماعان جاعدايدا بارلىق شىعىندى شەتەلدىكتى ەلگە الىپ كەلگەن اۋە كومپانياسى كوتەرەدى.