ق ر بالا قۇقىقتارى جونىندەگى ۋاكىلى زاعيپا بالييەۆا 12 جاسقا دەيىنگى بالالاردى قاراۋسىز قالدىراتىن اتا-انا الاردى جازالاۋ تۋرالى ۇسىنىسىنا تۇسىنىكتەمە بەردى، دەپ حابارلايدى Qamshy.kz اقپارات اگەنتتىگى.

"جەلى قولدانۋشىلارى اتا-انالاردىڭ جاۋاپكەرشىلىگى تۋرالى ايتقان ءسوزىمدى قىزۋ تالقىلاپ جاتقان كورىنەدى. بۇل ماسەلەنىڭ اينالاسىنداعى ساۋالدارعا مەنەن ارتىق ەشكىم جاۋاپ بەرە المايدى دەپ ويلايمىن. ەسەپتىك كەزدەسۋدە اتا-انالاردىڭ جاۋاپكەرشىلىگىن بالا قاۋىپسىزدىگىن قامتاماسىز ەتەتىن نەگىزگى قۇرال دەپ اتاعان بولاتىنمىن. مەنىڭ تاراپىمنان بۇل تارماققا باسا نازار اۋدارىلدى. اتا-انالاردىڭ بالا ءولىمى مەن جاراقاتتانۋدى الدىن-الاتىن نەگىزگى شارالاردى تۇراقتى قولداناتىنى بەلگىلى"، - دەپ جازادى بالييەۆا facebook پاراقشاسىندا.

بالييەۆا سوڭعى جىلدارداعى بالا ولىمىنە قاتىستى ستاتيستيكا قورقىنىشتى ەكەنىن ايتادى. ال سەبەپتەرى ودان دا اۋىر. ءاربىر ءۇشىنشى وقىس جاعداي اتا-انالاردىڭ سالاقتىعىنان بولعان. ونىڭ ويىنشا بۇل ماسەلەگە بەي-جاي قاراۋعا بولمايدى. 

بۇل رەتتە بالييەۆا اتا-انالاردىڭ جاعدايىنا ىڭعايلى شارالار قولدانىلادى دەيدى. ەگەر بالانىڭ اناسى وتباسىنداعى جالعىز اسىراۋشى بولسا، 50 مىڭ جالاقىعا ءبىر جەردە ساتۋشى بولىپ جۇمىس ىستەيتىن بولسا، بالا كۇتۋشىسىن جالداۋ قيىنعا سوعادى. وسى سەبەپتى ءبىز اتا-انالار ءۇشىن بالالارىنىڭ بالا-باقشاسىنا جاقىن جەردەن جۇمىس تاۋىپ بەرۋ جاعدايىن قاراستىرىپ جاتىرمىز.

"بىزدەر قاراما-قايشى جاعدايلار دا كەزدەسەدى. مىسالى اتا-اناسى بالاسىن ۇيىقتاتىپ، ەسىكتى كىلتتەپ، قوناققا كەتىپ قالادى. قاراۋسىز قالعان بالا ول ۋاقىتتا ويانىپ وقىس جاعدايدان كوز جۇمادى نەمەسە جاراقات الادى. 111 نومىرىنە وسىعان ۇقساس جاعدايمەن ءبىر كۇندە قانشاما ادام كومەك سۇراپ حابارلاساتىنىن بىلسەڭىزدەر، شوشيتىن ەدىڭىزدەر"، - دەدى بالا قۇقىقتارىن قورعاۋ جونىندەگى ۋاكىل.

"ەكى جاعدايدىڭ اراسى جەر مەن كوكتەي ەكەنىن اتاپ وتكىم كەلەدى. ءبىرىنشى جاعدايدا بىزگە ويلانۋ كەرەك. قيىن جاعدايعا قاراماستان بالالارىن اسىراپ وتىرعان باتىر انالارعا ارنالعان ناقتى ۇسىنىستار كۇتەمىن. ەكىنشى جاعدايدا مەملەكەت بالانىڭ ولىمىنە اكەلىپ سوقتىراتىن جاۋاپسىزدىققا بەي-جاي قاراماي، جازا ءتۇرىن اۋىرلاتۋ كەرەك. بالانىڭ ويىنشىق، ماشينا، نەمەسە جەكە زات ەمەس ەكەنىن ءتۇسىنۋىمىز كەرەك. بالا - ءومىر سۇرۋگە قۇقىعى بار تۇلعا"، - دەدى بالييەۆا. 

بالالار ومبۋدسمەنى ەلىمىزدە گەرمانيا تاجىريبەسىندەگى بالانى قاراۋسىز قالدىرعاندارعا زاڭ جۇزىندە قولدانىلاتىن ءتاسىل قارالىپ جاتقانىن ايتىپ ءوتتى. 

"بۇل زاڭ كەلەسىدەي لوگيكا بويىنشا جاسالىپ جاتىر: بالا ۇيدە جالعىز قالعاندا تەرەزەدەن قۇلاۋى، ۇيدە ءورت تۇتانۋى مۇمكىن، توققا ءتۇسىپ نەمەسە پىشاقپەن جارالانۋى مۇمكىن. بۇل جاعدايلار ەلىمىزدە ءقازىردىڭ وزىندە ءجيى بولادى. البەتتە بارلىعى اتا-انالاردىڭ جاۋاپسىزدىعىنان دەپ ايتۋ ارتىق. كوبىسى  ءومىر ءسۇرۋ ءۇشىن، بالالارىن اسىراۋ ءۇشىن جۇمىس ىستەۋگە ءماجبۇر.قازىرگى تاڭدا ءبىر عانا فاكت بەلگىلى: بالالار جاراقات الىپ جاتىر جانە بولماشى جاعدايدىڭ كەسىرىنەن اجال قۇشۋدا. ماسەلەنىڭ كۇرمەۋىن ۇكىمەت پەن بالالار ومبۋدسمەن ءينستيتۋتى بىرىگىپ شەشۋى ءتيىس. اتالعان پروبلەمانى شەشۋگە، ناقتى شارالار قولدانۋعا ارنالعان ۇسىنىستارىڭىز بولسا قۋانا قابىلداۋعا ءازىرمىن" - دەپ قورىتىندىلادى بالييەۆا. 

ەستەرىڭىزگە سالامىز، زاعيپا بالييەۆا وسىعان دەيىن 12 جاسقا دەيىنگى بالالاردى قاراۋسىز قالدىرۋعا تىيىم سالۋدى ۇسىنعان بولاتىن.