«استانا» پرەزيدەنتتىك كاسىبي سپورت كلۋبى («استانا» پكسك، قازاقستان) «سەتانتا سپورت ەۋرازيا» جانە «سەتانتا سپورت ەۋرازيا پليۋس» تەلەارنالارىنىڭ مەنشىك يەسى «Eurasian Broadcasting Enterprise Limited» (EBEL، ۇلىبريتانيا) كومپانياسىمەن بىرلەسە وتىرىپ، ەلىمىزدە ۇلتتىق سپورتتىق تەليەۆيزيالىق كونتەنت قۇرۋ جوباسىن قولعا الدى، دەپ حابارلايدى Qamshy.kz اقپارات اگەنتتىگى. 

بۇگىن لوندونداعى قازاقستان رەسپۋبليكاسىنىڭ ۇلىبريتانياداعى ەلشىلىگىندە قوس تاراپ ءوزارا كەلىسىم مەموراندۋمىنا قول قويدى. اتالمىش قۇجات «استانا» پرەزيدەنتتىك كلۋبىنىڭ قۇرامىنا كىرەتىن بارلىق كلۋبتاردىڭ سپورتتىق جەتىستىكتەرى مەن جارىستارىنىڭ «سەتانتا سپورت ەۋرازيا» جانە «سەتانتا سپورت ەۋرازيا پليۋس» تەلەارنالارى ارقىلى قالىڭ بۇقاراعا تاراتىلاتىنىن ايعاقتايدى.  

مەموراندۋمداعى كەلىسىمگە سايكەس، قازاقستان، ءازىربايجان، ارمەنيا، بەلورۋسسيا، گرۋزيا، لاتۆيا، ليتۆا، مولدوۆا، قىرعىزستان، تاجىكستان، تۇركمەنستان، وزبەكستان جانە ەستونيا سىندى ەلدەردىڭ قالىڭ اۋديتورياسى اتالمىش تەلەارنالار ارقىلى «استانا» برەندىمەن ەل نامىسىن قورعاپ جۇرگەن بارلىق ۇزدىك كلۋبتارىمىز بەن سپورتشىلارىمىزدىڭ جەتىستىكتەرى مەن جارىستارىن تىكەلەي ەفيردە تاماشالاي الادى. سونداي-اق، ءبىزدىڭ سپورتشىلارىمىز جايلى ارنايى باعدارلامالار، ەكسكليۋزيۆتى سۇحباتتار، جاڭالىقتار ءبولىمى جانە ساراپتامالىق باعدارلامالار جاسالادى. 

EBEL حالىقارالىق ءىرى سپورتتىق برودكاستەردىڭ تەلەارنالارىنداعى العاشقى بىرلەسكەن سپورتتىق باعدارلامالىق ەفير 2018 جىلدىڭ قىركۇيەك ايىنا جوسپارلانعان.

سونىمەن قاتار، حالىقارالىق سپورتتىق تەلەكومپانيا مەن قازاقستان تاراپىنىڭ كەلىسسوزدەرى بارىسىنداعى تاعى ءبىر ماڭىزدى ماسەلە – «سەتانتا سپورت» اياسىندا جەلى ارقىلى تارالاتىن جانە قازاق تىلىندە كوپشىلىككە ۇسىنىلاتىن جاڭا سپورتتىق تەلەارنا قۇرۋ بولىپ تۇر. بۇل جوبا حالىقارالىق ارەناداعى سپورتتىق كونتەنتىمىزدىڭ بەدەلىن ارتتىرىپ قانا قويماي، وتاندىق قازاق ءتىلدى جۋرناليستەردىڭ شىعارماشىلىق جۇمىستارىنا جاڭا مۇمكىندىكتەر اشادى.

ءوز كەزەگىندە «استانا» پرەزيدەنتتىك كلۋبى جاڭا جوبانى جۇزەگە اسىرۋ بارىسىندا قازاقستاندىق سپورتتىق جۋرناليستەردى تارتۋ ماسەلەسىنە قىزىعۋشىلىق بىلدىرەتىنىن حابارلايدى.