الماتىدا ەلىمىزگە تانىمال كلاسسيكالىق مۋزىكا جانرىنىڭ مايتالماندارى استانانىڭ 20 جىلدىعىنا ارناپ قالا قوناقتارى مەن تۇرعىندارىنا تاماشا كەش سىيلادى، دەپ حابارلايدى Qamshy.kz اقپارات اگەنتتىگى. 

«جۇرەكتەگى ارمانمەن، شىڭدارعا شىعۋ جولىندا!» اتتى كونسەرتتە ق ر تۇڭعىش پرەزيدەنت قورىنىڭ لاۋرەاتتارى ونەر كورسەتتى.

اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنا جينالعان كوپشىلىك الەمدىك وپەرا جانە كلاسسيكالىق مۋزىكا جانرىنىڭ مارجاندارىنا سۋسىندادى.

تەاتر فوەسىندە  استانانىڭ 20 جىلدىعىنا ارنالعان «استانا – ۇلى دالا جاۋھارى» اتتى فوتوكورمە ۇيىمداستىرىلدى.

كونسەرت نۇرجان بايبوسىنوۆتىڭ جەتەكشىلىگىمەن ق ر مەملەكەتتىك اكادەميالىق سيمفونيالىق وركەسترىنىڭ مۋزىكالىق سۇيەمەلدەۋىمەن ءوتتى.

«ۇلكەن وپەرا» تاقىرىبىمەن وتكەن كەش كومپوزيتور تىلەس قاجىعالييەۆتىڭ «قىز قۋۋ» ۋۆەرتيۋراسىمەن اشىلدى.  

 «سترانا ۋلىبوك» وپەرەتتاسىنان  ليزا مەن سۋ چونگتىڭ دۋەتىن ورىنداعان بيبىگۇل جانۇزاق پەن مەدەت چوتابايەۆ كورەرمەننىڭ ەرەكشە ىقىلاسىنا بولەندى. ۆەنگر كومپوزيتورى فرانس لەگارعا 20 عاسىردىڭ باسىندا ەرەكشە تانىمالدىلىق اكەلگەن ءۇش اكتىلى شىعارمادا ەرەكشە ماحاببات وقيعاسى باياندالعان. قوس ونەرپاز اتالمىش شىعارمانىڭ ءمانى مەن مازمۇنىن اشىپ، كوپشىلىكتىڭ جۇرەگىنەن ورىن الا ءبىلدى.

بۇل كەشتى ادامزاتتىڭ مۋزىكا ونەرىنە دەگەن كوزقاراسىن وزگەرتىپ، ءان الەمىنە ەرەكشە قانىق بوياۋلار اكەلگەن تانىمال كومپوزيتور ليۋدۆيگ ۆان بەتحوۆەننىڭ شىعارمالارىنسىز ەلەستەۋ مۇمكىن ەمەس ەدى. ۇلى مۋزىكانتتىڭ ۆيولونچەل، سكريپكا جانە فورتەپيانوعا ارنالعان ۇزدىك شىعارماسىن «فورتە» تريوسى ەل نازارىنا ۇسىندى.

مازمۇنى بولەك، ءمانى ەرەكشە كەشتە تەك كلاسسيكالىق مۋزىكا مايتالماندارى ونەر كورسەتكەن جوق. وتكەن عاسىردىڭ ورتاسىندا لەنينگراد وپەرا جانە بالەت تەاترىندا ارام حاچاتۋرياننىڭ جەتەكشىلىگىمەن العاش رەت ساحنالانعان «سپارتاك» بالەتىنەن ءۇزىندىنى «استانا بالەت» تەاترىنىڭ سوليستەرى مادينا باسپايەۆا مەن سەرىك ناكيسپەكوۆ ورىنداپ شىقتى.  

حالىقارالىق فەستيۆالدەردىڭ جەڭىمپازى مەدەت چوتابايەۆ دجاكومو ءپۋچچينيدىڭ الەمدىك ساحنالاردىڭ قازىناسىنا اينالعان تۇراندوت وپەراسىنان كالافانىڭ ارياسىن شىرقادى.  

كونسەرتكە رەسەي مەن ەۋروپاعا كەڭىنەن تانىمال وتاندىق وپەرا جۇلدىزى سۇندەت بايعوجين دە قاتىستى. ول لاتيف حاميدي مەن احمەت جۇبانوۆتىڭ «اباي» وپەراسىنان ءۇزىندى ورىندادى. ايتا كەتەيىك، سۇندەت بايعوجين اتالعان شىعارمانى رەسەيدىڭ «بولشايا وپەرا» جوباسىندا قالىڭ كوپشىلىك نازارىنا ۇسىنىپ، قازىلار القاسىنىڭ تاڭدانىسىن تۋدىرعان بولاتىن.

اسقاق ونەردىڭ ءقادىر قاسيەتىن بويىنا سىڭىرگەن وپەرا ءانشىسى تاتيانا ۆيسينسكايا ايگىلى «كارمەن» وپەراسىنان ءۇزىندى شىرقاپ، كەشتىڭ كوركىن قىزدىرا ءتۇستى.

اۋەزدى اۋەن مەن مازمۇندى شىعارما، مۋزىكالىق ءيىرىم مەن سازدى ىرعاق ۇيلەسىم تاپقان كونسەرت دجۋزەپپە ۆەرديدىڭ ايدا وپەراسىنان الىنعان ۇزىندىمەن قورىتىندىلاندى.

سونىمەن قاتار كونسەرتكە گاۋحار تاسبەرگەنوۆا، بيبىگۇل جانۇزاق، گۇلزات داۋربايەۆا، ەرمەك كۋرمانايەۆ، ەركەبۇلان ساپاربايەۆ، اناستاسيا كوجۋحاروۆا، ەميل ساكاۆوۆ سىندى ونەرپازدار قاتىسىپ كورەرمەننىڭ ىستىق ىقىلاسىنا بولەندى.

اسەرلى كەشتەن سوڭ ونەرپازدار تەاتر فوەسىندە كورەرمەندەرگە قولتاڭبا بەرىپ، ەستەلىككە سۋرەتكە ءتۇستى.