ىشكى ىستەر ءمينيسترى قالمۇحانبەت قاسىموۆ ەلىمىزدەگى ەڭ ىشكىش وبلىستاردى، انىعى ىشىمدىكتىڭ كەسىرىنەن ءجيى قىلمىس جاسالاتىن وڭىرلەردى اتادى.

ءمينيستردىڭ دەرەگىنە سۇيەنسەك، ەڭ جوعارى دەڭگەي اقتوبە وبلىسىندا بايقالعان. ماس كۇيىندە جاسالعان قىلمىس دەڭگەيى وبلىستا 28 پايىزدى كورسەتتى. قوستاناي وبلىسىندا 25،5 پايىز، پاۆلودار وبلىسىندا 22 پايىز، ماڭعىستاۋ وبلىسىندا – 20 پايىز جانە اقمولا وبلىسىندا 19،5 پايىزدى كورسەتتى.

«ەلىمىزدە ىشىمدىككە سالىنۋ، وتباسىلىق-تۇرمىستىق سالادا قىلمىس جاساۋ ازايماي تۇر»، - دەيدى قاسىموۆ.

بۇگىندە ۋچاسكەلىك پوليسيا ينسپەكتورلارىنىڭ پروفيلاكتيكالىق باقىلاۋىندا ىشىمدىككە سالىنعان 67 مىڭ ازامات بار ەكەن. ىشىمدىكتىڭ كەسىرىنەن كۇنىنە 2-3 قىلمىس تىركەلەدى. وسى ماسەلەنى شەشۋ ءۇشىن مينيسترلىك ءتيىستى شارالاردى قولدانۋعا ۋادە بەردى.

ق ر پرەمەر ءمينيسترى باقىتجان ساعىنتايەۆتىڭ بىرنەشە اي بۇرىنعى قاۋلىسىنا سايكەس، ءسپيرتتى ىشىمدىكتەردىڭ باعاسى قىمباتتاۋى ءتيىس ەدى.  اراق جانە وتكىر ليكەر-اراق ونىمدەرىنىڭ ءبىر ءليترىنىڭ بولشەك ساۋداداعى ەڭ تومەنگى باعاسى 2018 جىلى 1900 تەڭگە ەتىپ بەكىتىلگەن.