استانا-الماتى پويىزى شىعىپ كەتكەن ۋچاسكەدەگى تەمىر جولدار بيىل 6 ماۋسىم كۇنى تەكسەرىستەن ءوتتى، دەپ حابارلايدى 24.kz.

ال ماشينيست رۇقسات بەرىلگەن جىلدامدىقتى اسىرعان جوق. بۇل تۋرالى «قازاقستان تەمىر جولى» كومپانياسىنىڭ ءتوراعاسى قانات الپىسبايەۆ ۇكىمەت قابىرعاسىندا مالىمدەدى. ونىڭ حابارلاۋىنشا، وقيعانىڭ سەبەبى جۇك جانە جولاۋشىلار پويىزدارىنىڭ سوقتىعىسۋى ەمەس. ساراپتاما جۇرگىزۋ ءۇشىن تىنىشبايەۆ اتىنداعى كولىك جانە كوممۋنيكاسيا اكادەمياسى جانە بۇكىلرەسەيلىك تەمىرجول كولىگى عىلىمي زەرتتەۋ ينستيتۋتىنىڭ ماماندارى جۇمىلدىرىلدى.

قانات الپىسبايەۆ، «قازاقستان تەمىر جولى» ۇك» اق باسقارما ءتوراعاسى:

- قازىرگى تاڭدا كوميسسيا وقيعا بولعان ورىننىڭ ينفراقۇرىلىمدىق جاعدايىن تەكسەرىپ جاتىر. قاجەتتى ولشەمدەر جاسالادى. بولاشاقتا مۇنداي وقيعالاردىڭ الدىن الۋ ءۇشىن ءتيىستى شارالاردى قابىلدايمىز. ماۋسىم ايىنىڭ سوڭىنا دەيىن كوميسسيا ءوز جۇمىسىن اياقتايدى. تەمىرجولداعى قاۋىپسىزدىك دەڭگەيىن باقىلاۋدى كۇشەيتەمىز.