جۇڭگو كينوكومپانياسى قازاقستاندىق ءانشى ديماش قۇدايبەرگەن تۋرالى فيلم ءتۇسىرۋدى جوسپارلاپ وتىر. بۇل تۋرالى شىعارماشىلىق جانە عىلىمي فورۋم جيىنىندا قازاق ونەر ۇلتتىق ۋنيۆەرسيتەتىنىڭ رەكتورى ايمان مۇساقوجايەۆا حابارلادى.

«ءبىز بيىل «ەۋرازيا» كينوفەستيۆالىنە كەلەتىن BJ Brothers كومپانياسىمەن بىرلەسىپ جۇمىس ىستەيمىز. كومپانيا قازاقستاننىڭ تانىمال ءانشىسى ديماش قۇدايبەرگەن جايلى فيلم ءتۇسىرۋدى جوسپارلاپ وتىر. ديماش جايلى فيلم ءتۇسىرۋ يدەياسىن كانن فەستيۆالى بارىسىندا فەستيۆال باسشىسىمەن اقىلداسقان ەدىك»، - دەدى مۇساقوجايەۆا.

ءفيلمنىڭ كونسەپسياسى، جانرى، سيۋجەتى ازىرگە بەلگىسىز. رەكتوردىڭ ايتۋىنشا، ديماش قۇدايبەرگەن بيىل ونەر ۋنيۆەرسيتەتىنىڭ ديپلومىن الىپ، ەلورداداعى ءبىتىرۋ كەشىنە بارادى. ال ءانشىنىڭ تۋعان جەرىنە وتانداستاردان بولەك شەتەلدىك جانكۇيەرلەر جينالماق ەكەن.

قازاقستاننىڭ حالىق ءارتىسى قىتايداعى كينو ستۋديالاردىڭ بىرلەسكەن جوبا اياسىندا جۇمىس ىستەيتىن سەرىكتەستەردى ىزدەپ جۇرگەنىن دە حابارلادى.

استانانىڭ 20 جىلدىعىنا وراي  «ەۋرازيا» XIV حالىقارالىق كينوفەستيۆالى 1-7 شىلدە ارالىعىندا وتپەك. فەستيۆالعا فرانسۋز اكتەرى ۆەنسانا كاسسەل، «ايكا» فيلمىندە باستى ءرولدى سومداعان سامال ەسلياموۆا، سلوۆاكيا جانە سەربيا كينورەجيسسەرى ەمير كۋستۋريسا قاتىسادى دەپ جوسپارلانىپ وتىر.