الەۋمەتتىك جەلى جانە ءبىرقاتار سايتتاردا قازاقستان حالىق بانكىنىڭ بانكوماتتارى جۇڭگو تىلىندە قىزمەت كورسەتۋدى باستادى دەگەن اقپاراتقا بانك ءوز تاراپىنان كەلەسىدەي جاۋاپ بەرەدى.

حالىق بانكتىڭ كليەنتتەرى China UnionPay قىتايدىڭ حالىقارالىق تولەم جۇيەسىنىڭ كارتالارىن قولدانۋىنا بايلانىستى، اتاۋلى تولەم جۇيەسى شىعارعان كارتالار ارقىلى بانكوماتتاردا قولما-قول اقشا قاراجاتىن الۋ ترانزاكسياسى ءجيى جۇرگىزىلۋ ەسەبىنەن، تەك كليەنتتەرگە ىڭعايلى بولۋ ماقساتىندا قوسىمشا جۇڭگو ءتىلى ەنگىزىلگەن. بانك بانكوماتتارى جۇڭگو تىلىندە 2006 جىلدان باستاپ قىزمەت كورسەتۋدە. قازىرگى تاڭدا بانكتىڭ كەز كەلگەن كليەنتى بانكوماتتا وزىنە ىڭعايلى 4 ءتىلدىڭ ءبىرىن تاڭداپ قىزمەتتى تۇتىنا الادى. اتاپ اتيساق:
1. قازاق تىلىندە
2. ورىس تىلىندە
3. اعىلشىن تىلىندە
4. جۇڭگو تىلىندە

2018 جىلعى ماۋسىم ايىنىڭ 22 جۇلدىزىندا، ياعني بۇگىن، تاڭعى ساعات 8 شاماسىندا وتەگەن باتىر 82ا مەكەنجايىندا ورنالاسقان بانك بانكوماتىندا، كليەنتتىڭ قازاق ءتىلىن تاڭداۋ بارىسىندا وكىنىشكە وراي تەحنيكالىق اقاۋلار ورىن الىپ، اۆتوماتتى تۇردە جۇڭگو ءتىلىنىڭ تاڭدالۋى جايىندا الەۋمەتتىك جەلىدەگى بانكتىڭ رەسمي پاراقشاسىنا شاعىم كەلىپ تۇسكەن بولاتىن. ورىن العان ولقىلىق ءتيىستى بولىمگە شۇعىل جولدانىپ، تولىقتاي بۇل ماسەلە تۇزەتىلدى. قازىرگى ۋاقىتتا مەڭزەگەن بانكومات ەش اقاۋسىز قالىپتى تۇردە قىزمەت اتقارۋدا. سونداي-اق، اتاۋلى جاعداي تەك ءبىر عانا بانكوماتتا بايقالعانىن ايتا كەتەيىك جانە الداعى ۋاقىتتا وسى سىندى كەلەڭسىزدىكتى بولدىرماۋ ماقساتىندا ەلىمىزدىڭ بارلىق وڭىرىندە ورنالاسقان بانكوماتتاردى تەكسەرۋ جۇمىستارى جۇرگىزىلۋدە