ولجاس سۇلەيمەنوۆتىڭ قايتىس بولعان نەمەرەسى ەسكەندىر سۇلەيمەنوۆتىڭ قالىڭدىعى الۋا بەكقوجا Tengrinews.kz تىلشىسىنە سۇحبات بەردى. سۇحباتى بارىسىندا الۋا ەسكەندىردىڭ موتوسيكل ايداۋىنا تۇبەگەيلى قارسى بولعانىن ايتادى. الايدا جىگىت موتوسيكل الۋدى بالا كەزىنەن ارمانداعان ەكەن. ءتىپتى اتا-اناسى دا قارسى بولعان كورىنەدى.

«ەسكەندىر ءبىر ءىستى قولىنا السا، سوڭىنا دەيىن جەتكىزبەي قويمايدى. موتوسيكل الۋدى بالا كەزىنەن ارماندادى. الماۋىن ءوتىندىم، ءتىپتى «نە مەنى، نە موتوسيكلى تاڭداۋىن» تالاپ ەتتىم. ءبىراق مۇنىمنان تۇك شىقپادى»، - دەپ ەسىنە ءتۇسىردى الۋا.

ەسكەندىر مەن الۋا بىرنەشە ۋاقىت جاقىن دوستار بولىپ ارالاسىپ جۇرگەن. ۋاقىت وتە كەلە ەكى جاس ەكەۋىنە ورتاق ەرەكشە سەزىمنىڭ بارىن بايقايدى، ولار بىر-بىرىنە دوستاردان دا جاقىن ەدى. ەكى اي بۇرىن جىگىت قىزعا ۇيلەنگىسى كەلەتىنىن ايتىپ ۇسىنىس جاسايدى، ءبىر-بىرىنىڭ اتا-انالارىمەن تانىسادى. جاقىن ۋاقىتتا دۇركىرەتىپ توي جاساماق نيەتتە بولعان ەكەن. الايدا تاعدىردىڭ ىسىنە شاراڭ بار ما؟! جاستاردىڭ ماڭگىلىك بىرگە بولۋىن جازباعان ەكەن.

الۋا سۇيىكتىسىنىڭ ادامگەرشىلىك قاسيەتتەرى جايلى سىر شەرتتى.

«ەسكەندىر اق جارقىن جىگىت ەدى. وزگەلەردەن ونى ەرەكشەلەپ تۇراتىن كوركەم مىنەزى بولدى. مەيىرىمدى ەدى، ادامداردىڭ تەك جاقسى جاقتارىن كورەتىن»، - دەدى قىز.

ال ەسكەندىردىڭ قازاسى جايلى حاباردى الۋا جۇمىستا بولعاندا ەستىگەن. ءومىرىن ارناماق بولعان سۇيىكتىسىنىڭ ەندىگى جوق ەكەنىنە قىز ءالى سەنبەيدى. جول اپاتى بولار كۇن بۇرىن ەكەۋى جەلى ارقىلى سويلەسكەن ەكەن. الايدا ەسكەندىر الۋانىڭ سوڭعى جازعان حاتىن سول كۇيى وقىمادى. 

ايتا كەتەيىك، ەسكەندىر سۇلەيمەنوۆ  22 ماۋسىمدا استاناداعى ماڭگىلىك ەل – كەرەي-جانىبەك كوشەلەرىنىڭ قيىلىسىندا جول اپاتىنان قايتىس بولدى. ونى تۋىستارى الماتى قالاسىندا جەرلەدى.