اقش پرەزيدەنتى دونالد ترامپ اقش-تىڭ دۇنيەجۇزىلىك ساۋدا ۇيىمىنان شىعاتىنىن تالقىعا سالدى. جۇما كۇنى وتكەن جيىندا ترامپ «ساۋدا تۇرعىسىنان جاۋلارىمىز ەمەس، دوستارىمىز ارقامىزعا پىشاق سۇقتى، ءبىراق ءبىز تاعى دا اقىلىمىزعا جۇگىنەمىز. ءار ارەكەتىمىزدى ويلانىپ، دۇرىس شەشىم قابىلدايمىز. ءبىزدى ەشكىم پايدالانىپ كەتە المايدى»، - دەپ مالىمدەدى.

«گولوس امەريكي» پورتالىنىڭ حابارلاۋىنشا، ترامپتىڭ بۇل ەسكەرتپەسى – ءوز زامانىندا اقش باستاماشى بولعان حالىقارالىق كەلىسىمدەر مەن امەريكانىڭ وداقتاستارىنا اۋىر اۋىر سوققى بولماق.

ترامپ ەۋرو وداق، G7، ناتو، دۇنيەجۇزىلىك ساۋدا ۇيىمدارىمەن سەرىكتەس بولۋدان گورى تايتالاسۋعا نيەتتەنگەن سىڭايلى. ونىڭ ويىنشا، ساۋدا اياسىندا وزگە ەلدەرمەن تىكەلەي سەرىكتەستىك ورناتۋ الدەقايدا وڭتايلى.

اتلانتا كەڭەسىنىڭ قۇرمەتتى مۇشەسى الەكساندر ۆەرشبوۋدىڭ سوزىنشە، دونالد ترامپ اقش پرەزيدەنتىنىڭ رولىنەن اسىپ، حالىقارالىق تارتىپكە سوعىس جاريالاماق ويدا كورىنەدى.

ەكى اپتادان كەيىن ترامپ ناتو-نىڭ جىل سايىنعى سامميتىنە قاتىسۋ ءۇشىن ەۋروپاعا اتتانادى. ودان بۇرىن ۇلىبريتانياعا جولى ءتۇسىپ، پرەمەر-مينيستر تەرەزا مەيمەن كەزدەسەدى، كەيىن فينليانديادا رەسەي پرەزيدەنتى ۆلاديمير پۋتينمەن كەزدەسەدى.

«حەلسينيكيدەگى كەزدەسۋ ترامپ پەن ءپۋتيننىڭ اراسىندا جاڭا سەرىكتەستىكتىڭ ورناۋىنا مۇمكىندىك بەرەدى»، - دەگەن ەدى اقش-تىڭ رەسەيدەگى ەلشىسى ۆەرشبوۋ.

اقش قارجى ءمينيسترى ستيۆەن منۋچين پرەزيدەنتتىڭ دسۇ-دان شىعۋىن قولدامايدى. ونىڭ ويىنشا، دونالد ترامپ «تىم اسىرەلەپ جىبەردى». ءارى دسۇ-نىڭ كەي اسپەكتىلەرىن «ادىلەتسىز» دەپ ەسەپتەيتىن كورىنەدى.

اق ءۇيدىڭ زاڭناما قىزمەتتەرى بويىنشا ديرەكتورى مارك شورت جۋرناليستەرگە بەرگەن سۇحباتىندا اقش-تىڭ دۇنيەجۇزىلىك ساۋدا ۇيىمىنان شىعاتىنى تۋرالى اقپاراتتان مۇلدە حابارسىز ەكەنىن ايتتى.

دۇنيەجۇزىلىك ساۋدا ءۇيى 1995 جىلى قۇرىلعان. ول حالىقارالىق ساۋدانى رەتتەپ وتىراتىن جالعىز حالىقارالىق ۇيىم.