كاسىپكەرلەرگە سۋبسيديا بەرۋدە ەلەكتروندى قۇجات اينالىمى ەنگىزىلدى

/uploads/thumbnail/20180702113545422_small.jpg

«بيزنەستىڭ جول كارتاسى 2020» بيزنەستى قولداۋ مەن دامىتۋدىڭ ءبىرىڭعاي باعدارلاماسى اياسىندا شاعىن كاسىپكەرلەردىڭ نەسيەسىن سۋبسيديالاۋ تۋرالى «دامۋ» قورى، ەدب جانە كاسىپكەرلەر اراسىنداعى ءۇشجاقتى كەلىسىمگە ەندى ەلەكتروندى فورماتتا قول قويىلادى. نەسيەنى سۋبسيديالاۋ تۇرىندەگى مەملەكەتتىك قىزمەت ءتۇرىن الۋ شارتىنا بۇدان بىلاي ۋاقىت، ورنالاسقان جەرىنە قاراماستان قول قويۋعا بولادى. ول ءۇشىن تەك ينتەرنەت جەلىسى مەن ەلەكتروندى-ساندى قولتاڭبا عانا كەرەك.

«دامۋ» قورىنىڭ باسقارما ءتوراعاسى اباي سارقۇلوۆتىڭ ايتۋىنشا، اتالعان قىزمەتتىڭ قولجەتىمدى بولۋىنىڭ ارتىقشىلىقتارى كوپ. اتاپ ايتقاندا، سۋبسيديالاۋ تۋرالى شارت راسىمدەۋگە كەتەتىن ۋاقىت قىسقارىپ، شىعىندار ازايادى. «سۋبسيديالاۋ تۋرالى وڭ شەشىم شىققان سوڭ كاسىپكەرلەر كومەكقارجى الۋعا جاسالعان شارتقا ونلاين  رەجيمدە قول قويا الادى. وسىلايشا شارتقا قول قويۋ ءۇشىن (شارتقا قوسىمشا كەلىسىمگە قول قويۋ ءۇشىن دە) الىس اۋدانداردان قور فيليالىنا كەلىپ نەمەسە اتشاباردىڭ قىزمەتى ءۇشىن شىعىندانىپ قاجەتى جوق. ەلەكتروندى شارتتى ونلاين تۇردە جاساپ، بىرنەشە سەكۋند ىشىندە قول قويا الاسىز. بۇعان دەيىن سۋبسيديالاۋ شارتىنا قاعاز جۇزىندە قول قويۋ راسىمىنە 5-7 جۇمىس كۇنىنە دەيىنگى ۋاقىت كەتەتىن».

سۋبسيديا بەرۋدە ەلەكتروندى قۇجات اينالىمىن العاشقى بولىپ «سەسنابانك» اق ەنگىزدى. قور قىزمەتتىڭ قاناتقاقتى سىناعىن ءساتتى جۇزەگە اسىردى. الداعى ۋاقىتتا بۇل قىزمەت قوردىڭ بارلىق كليەنتتەرىنە قولجەتىمدى بولادى. بۇل قىزمەت «Documentolog» ج ش س كومپانياسىنىڭ ەلەكتروندى قۇجاتتارمەن الماسۋدىڭ قازاقستاندىق ورتالىعى (Doc24.kz) الاڭىندا جۇزەگە اسىرىلدى. ياعني، قىزمەتتى 100% قازاقستاندىق ءونىم دەۋگە بولادى.

قىزمەت كورسەتۋ پروسەستەرىن ۇنەمى جەتىلدىرىلىپ وتىرۋى كاسىپكەرلەرگە مەملەكەتتەن قولداۋ الۋ شارالارىن جەڭىلەدەتەدى.  «مەن قوناق ءۇي قىزمەتىن كورسەتەتىن كاسىپكەرمىن. اتالعان شارتقا ونلاين قول قويۋ مۇمكىندىگى تۋرالى ەستىگەنىمدە ءوز شارتىما قول قوياتىن كەزگە تۋرا كەلسە دەپ تىلەدىم. سەبەبى ءار مەكەمەگە ءبىر بارىپ، كەزەك كۇتىپ وتىرۋ ۋاقىتتى الادى. سۋبسيديالاۋ تۋرالى شارتقا ءۇش جاقتان قول قويۋ ءراسىمىن ونلاي رەجيمدە اتقارعانىما سەنە الماي دا وتىرمىن. بۇل وتە وڭاي، جىلدام، جاريالى جانە ىڭعايلى. تەك ينتەرنەت پەن ەلەكتروندى-ساندى قول ۇلگىسى بولسا جەتىپ جاتىر. بۇعان قول جەتكىزۋ جولىندا «دامۋ» قورى ۇلكەن ەڭبەك  ەتكەنى تۇسىنىكتى. مەن ولارعا العىس ايتقىم كەلەدى»، - دەيدى كاسىپكەر رايەۆ مۇراتبەك جۇرىسبەك ۇلى (ايمۇرات جك)

نەسيەگە سۋبسيديا الۋ ءۇشىن ءوتىنىم بەرۋ اۆتوماتتاندىرىلىپ، بيىل كۇزدە www.egov.kz ۆەب-پورتالىنا ورنالاستىرىلادى. مۇنىمەن قاتار جىلدىڭ ەكىنشى جارتىسىنان باستاپ eGov  پورتالىندا 182 ملن تەڭگەدەن استام نەسيە الۋشىعا بەرىلەتىن كەپىلدىك پروسەسى دە اۆتوماتتاندىرىلادى.

ەستەرىڭىزگە سالا كەتەيىك، 2016 جىلى كوكتەمدە شاعىن جانە ورتا كاسىپكەرلىككە قارجىلىق قولداۋ كورسەتۋ بويىنشا ەلەكتروندى ۇكىمەت پورتالى پلاتفورماسىنا ەنگىزىلگەن تۇڭعىش مەملەكەتتىك قىزمەت ءتۇرى – «دامۋ» قورىنىڭ كەپىلدىگى ەدى.  نەسيە الۋ ءۇشىن كەپىلزات جەتپەگەن كەزدە قوردىڭ كەپىلدىگىن پايدالانۋ قىزمەتى اۆتوماتتاندىرىلعالى بەرى eGov  پورتالى ارقىلى 2 403 كەپىلدىك بەرىلگەن. ياعني ونلاين-وتىنىمدەر ۇلەسى شامامەن 40%-دى قۇرايدى. بۇل قىزمەتكە قول جەتكىزۋ ءۇشىن پورتالعا تىركەلىپ، ءوتىنىم تولتىرىپ، بانكتىڭ وڭ شەشىمى جايلى حاتتىڭ ەلەكتروندى كوشىرمەسىن قوسا قىستىرىپ، ساندى-ەلەكتروندى تۇردە قول قويۋ كەرەك. ءوتىنىمىنىڭ قاي دەڭگەيدە قارالىپ جاتقانىن كاسىپكەر جەكە كابينەتى ارقىلى باقىلاي الادى.

پىكىر قالدىرۋ

قاتىستى ماقالالار