"جاڭا قازاقستان" فورۋمى الماتىدا باسپا ءسوز ءماسليحاتىن وتكىزىپ جاتىر، دەپ حابارلايدى Qamshy.kz اقپارات اگەنتتىگىنىڭ ءتىلشىسى. فورۋم بارىسىندا ساياساتكەرلەر اقش استاناسى ۆاشينگتونعا ساپارلارىنىڭ ناتيجەسىن ايتىپ بەردى.

جيىننىڭ كىرىسپە سوزىندە ساياستاكەر، فورۋم مۇشەسى ءامىرجان قوسانوۆ ۇكىمەتكە اشىق حات جولداعاندارىن حابارلادى. اشىق حاتتا قىتايلىق 51 كومپانيانىڭ قىزمەتى تۋرالى سۇراۋ سالىنعان ەكەن. ناقتىراق ايتقاندا، كومپانيالاردىڭ قىزمەتى، ەكونوميكاعا پايداسى، ەكولوگيالىق زيانى جانە جۇمىس كۇشىنىڭ كىمدەردەن قۇرالاتىنى (قازاقتاردان نەمەسە قىتايلاردان) سۇرالعان. 

فورۋم مۇشەسى، ساياساتكەر راسۋل جۇمالى اقش-تاعى كەزدەسۋلەر جايلى تولىعىراق ايتىپ بەردى.

"بىزبەن بىرگە امەريكادا جۇرگەن كورنەكتى ازاماتتارىمىز – بەلگىلى فيلوسوف، ساياساتتانۋشى ءۋاليحان تۇلەشوۆ، كاليفورنيادان كەلگەن قانات يبراگيموۆ سىندى جىگىتتەر قوسىلىپ، كەزدەسۋلەر وتكىزدىك. 10-15 شاقتى كەزدەسۋ مەن سۇحبات بولدى. ەڭ نەگىزگىلەرى – اقش-تىڭ كونگرەسى مەن سەناتى، مەملەكەتتىك دەپارتامەنتى، ۇلتتىق قاۋىپسىزدىك كەڭەستەرى، ءبىرتالاي ءىرى ساراپتامالىق ورتالىقتارىنداعى كەزدەسۋلەردى اتاپ وتسە بولادى. New York Times سىندى باسپا وكىلدەرىمەن سۇحبات بولدى. كەزدەسۋلەر ءبىر-بىر جارىم ساعاتقا سوزىلدى.

اقش – الەمدەگى جەتەكشى مەملەكەت. ءبىزدىڭ ماقسات – الەمدەگى ءسوزى جۇرەتىن، ىقپالى بار ەلدەرگە "جاڭا قازاقستاننىڭ" ءسوزىن جەتكىزۋ. قازاقستاندا قاتىپ قالعان رەسمي پىكىر عانا ەمەس، دەموكراتيالىق جولمەن، ادام قۇقىقتارىن قۇرمەتتەۋ، ولاردى ىسكە اسىرۋ، جاڭا كوزقاراستىڭ بارى، قاۋىپسىزدىك، ساياسي، ەكونوميكالىق تاقىرىپتاردى تالقىلاۋ"، - دەدى راسۋل جۇمالى.

وسى ايدىڭ اياعىندا ساياساتكەرلەر وبلىس ارالاۋعا شىقپاق. وڭىرلەردەگى حالىقپەن كەزدەسىپ، فورۋمنىڭ نەگىزگى باعدارلاماسىن جاساۋدى جوسپارلاپ وتىر.