قاتىگەز اتا-انا ءتىلازار ۇلىن تەمىرجول بويىنا تاستاپ كەتكەن. ءدال سول مەزەتتە جۇيتكىگەن پويىز دا جەتىپ، جەتكىنشەكتىڭ ومىرىنە ءقاۋىپ ءتونىپتى. بالانىڭ پەرىشتەسى قاققان بولۋى كەرەك، ادام كوپ جۇرە بەرمەيتىن جەردەن اياق استى تابىلا كەتكەن قىزدار ونى ءبىر اجالدان امان الىپ قالدى. بويجەتكەندەر وقيعانى بەينەكامەراعا ءتۇسىرىپ، تۋعان بالاسىنا سالعىرتتىق تانىتقان اتا-انانى ارەكەتىن سىنعا العان. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ حابارلايدى.

شويىن جولدىڭ ۇستىندە وتىرعان بالانى بايقاعان قىزدار بىردەن جانىنا بارعان. جەتكىنشەك وكسىگىن تىيا الماي وتىرىپتى. تاستاپ كەتكەن اتا-اناسىنا قاتتى رەنجىپ قالسا كەرەك. ءبىراز ۋاقىتتان سوڭ جۇيتكىگەن پويىزدىڭ كەلە جاتقانىن بايقاعان بويجەتكەندەر، رەلستەن ونى اكەتپەك بولادى. ءبىراق، اكە-شەشەسىنە دەگەن وكپەسى باسىلماعان ول تەمىرگە كەنەدەي جارماسىپ، وتىرىپ العان.

وسىلايشا، قىزداردىڭ تاباندىلىعىنىڭ ارقاسىندا اۋپىرىمدەپ ءجۇرىپ قۇتقارىلدى بالاقاي. كوپ ۇزاماي، وقيعا ورنىنا اناسى دا جەتكەن. شوشىعاننان با الدە باسقا سەبەپتەن بە، ءۇن قاتقانىن ەستىمەدىك. ەسەسىنە قۇتقارىپ قالعان قىزدار بار ءقاۋىپتى ەندى سەزىندى مە، ايتەۋىر جىلاپ جىبەرگەن.

«ۆى نە دۋمايتە، چتو يا نا ۆاس كريچۋ يلي پوۆىشايۋ تون. مەنيا پروستو ۆسيۋ ترياسەت. ۆى پونيماەتە، چتو مى تولكو چتو سپاسلي ۆاشەگو رەبەنكا! يا سەيچاس بۋدۋ پلاكات».

كەيىن وقيعانىڭ تەمىرتاۋدا بولعانى انىقتالدى. ەكى بالاسىن جەتەكتەگەن انا جەرگىلىكتى جاعاجايعا دەمالۋعا كەلگەن ەكەن.

«بالانىڭ قاتتى جىلاپ، قىرسىعىپ جاتقانىن كوردىم. اناسى ونى دەمالىس ورنىنا كىرگىزۋدى سۇرادى. ءبىراق، ول كونبەدى. جولدا وتىرىپ قالدى. اناسى ماس بولعان جوق. ولار ءبىراز دەمالىپ كەيىن بىرگە قايتقانىن كوردىم» - دەيدى كۋاگەر سەرگەي كۋزنەسوۆ.

ءبىز بەينەجازباداعى انانى دا تاپتىق. جولداسىمەن اجىراسقان، ەكى بالاسىن ءوزى جالعىز اسىراپ ءجۇر. سول كۇنى ادەتتەگىدەي، بالالارمەن بىرگە دەمالىسقا بارماق بولعان. ءبىراق كەنجەسى الدەنەگە رەنجىپ قالسا كەرەك. قىرسىققان. ۇلكەندەرىنىڭ كيىم-كەشەگىن جاعاجايعا كىرگىزۋگە كەتكەندە بولعان وقيعا دەپ ءتۇسىندىردى. وقيعاعا قاتىستى رەزونانس تۋعانىنان شوشىپ قالعان انا، ءوزىن جامانداعاندارمەن كەلىسپەيتىنىن ءبىلدىردى. جايتتان سوڭ جۇرەگى اۋىرىپ، ۋىس-ۋىس ءدارى ىشۋمەن ءجۇرمىن دەيدى.

«ارينە، مەنىڭ كىنام بار. بالاممەن بىرگە قالىپ سويلەسۋ كەرەك ەدى. ءبىراق، ۇلكەنىم وعان كونەدى. ال، كەنجەمنىڭ مىنەزى اۋىر. وزدىگىنەن ساباسىنا تۇسپەسە، ەشنارسە اسەر ەتە المايتىنىن بىلەمىن. بەينەنى سالعاندار وزدەرىنە جارناما جاساعىسى كەلگەن شىعار. وندا جازعان پىكىرلەرمەن كەلىسپەيمىن. بالامدى ۇرىپ كورمەگەنمىن» - دەيدى بالانىڭ اناسى يرينا كۋليچكوۆا.

وقيعا جەرگىلىكتى ءبىلىم ءبولىمىنىڭ نازارىنا دا ىلىكتى. 9 جاستاعى ساشاعا قاتىستى بۇعان دەيىن ەشقانداي ەسكەرتۋلەر بولماپتى. اناسىنا دا شاعىمدانعان كەز تىركەلمەپتى. دەگەنمەن، بەينەجازبادان سوڭ، التى ايلىق باقىلاۋ تاعايىندالعان.

«اناسىنىڭ بالالاردى وسىنداي جاعدايدا قالدىرۋىنا بايلانىستى اناسىن ەسەپكە الىپ، ەسەپتە ۇستايمىز دەپ ويلايمىن. تەك قانا تەمىرتاۋ قالالىق ءبىلىم ءبولىمى ەمەس، مەكتەپتىڭ سوس پەداگوگى بار، سىنىپ جەتەكشىسى قاداعالاپ، ەندى بولاشاقتا قاداعالاپ ۇستايتىن بولامىز» - دەيدى تەمىرتاۋ قالاسى ءبىلىم ءبولىمى باسشىسىنىڭ مىندەتىن اتقارۋشى حاليپا جاۋدينوۆا.

بالاسىنان ايىرىلىپ قالا جازداعان انا بەينەجازبانى جاريالاعاندارعا وكپەلى ەكەنىن جاسىرمادى. ءبىراق، پەرزەنتىن قۇتقارىپ قالعاندارعا ريزا ەكەنىن ءبىلدىردى.

گۇلنۇر جاقسىلىقوۆا