اينا قويدىم الدىما،
كورەيىن دەپ ءوزىمدى.
ەكى قۇلاق تاس ءبىتىپ،
شەل باسىپتى كوزىمدى...-دەپ كەلەتىن شاكارىم قاجىنىڭ سىر ءسوزى اتاقتى ورەنىمىز دەنيس تەندى كولىكتىڭ ايناسىنا بولا پىشاقتاپ كەتىپتى دەگەندى ەستىگەندە ەسىمە تۇسە كەتكەنى. نەگە؟ نەلىكتەن وسى ولەڭ سوزدەرى دەيسىز بە، سەبەبى ءبىزدىڭ قازىرگى قوعامنىڭ بەت بەينەسى اۋليەنىڭ وسى سوزىمەن بار قۇپيا سىرىن اشادى. ءبىزدىڭ جەمقورلىق جايلاعان، كىشكەنتاي ءسابيىن بوققا باتىرعان، جەتكىنشەگىن، ءجاسوسپىرىمىن ايۋاندىقپەن ارىن توگىپ، زورلاعان، ايەلزاتىن قاماپ، قورلاعان، جەر اناسىن دا اۋىق-اۋىق ساتامىن دەپ زاڭ شىعارماقشى بولىپ، وعان قارسىلاردى ايداپ، تۇرمەگە جاۋىپ، جۇڭگو سياقتى جىمىسقى ساياساتى بار اشكوز ەلدەن قارىز الىپ، جۇمىسشىسىن، جانسىزىن قۇرتتاي قاپتاتىپ، كيەلى توپىراعىمىزدى تاپتاتىپ، ال قىلمىسكەرىن قاماۋدان تەز بوساتىپ، ۇلت پاتريوتتارىن اباقتىعا قاماپ، نە كەرەك استى-ۇستىنە توڭكەرىلگەن قوعامىمىز، ونىڭ باسىنداعى بيلىك "نۇرلى ءجۇزىن" سول الاقانداي ايناعا توسسا نەنى كورەر ەدى؟ تۇكتى دە. تۇيەنىڭ تابانىنان دا قالىڭ بەتتەن نە كورۋى مۇمكىن؟ ءبارى اقشاعا ساتىلعان كەر ۋاقىت. سوتتا تۋرابيلەر جوق. اقشا تولەسە، كەز كەلگەن قىلمىسكەردى بوستاندىققا شىعارا سالادى. كوشەگە كامەرا قاپتاتقانى نە كەرەك، ايدىڭ-كۇننىڭ امانىندا قاراقشىلار ادام توناپ، پىشاقتاپ كەتە بەرەدى. دەنيس تەن بولعاسىن اشكەرە بولىپ قالدى بىلەم، ايتپەسە جاي ادامنىڭ ءبىرى بولسا، مۇنداي شۋ بولماس تا ەدى. كوشەدە ەمىن-ەركىن جۇرە المايتىن بولساق، وندا ءتارتىپ ساقشىلارى نەگە كەرەك؟ بۇگىنگى ناۋقانشىل، ساۋىقشىل، ال ۇلت مۇددەسى مەن ادامنىڭ ومىرىنە كەلگەندە توڭ مويىن، تاس سوقىر، تاس كەرەڭ بيلىگى بار بولسا دا تۋعان ەلىمىز جايلى جامان ايتقىڭ كەلمەيدى-اق، ءبىراق دەنيستىڭ ورنىندا ءبىزدىڭ كەز-كەلگەنىمىز بولۋىمىز مۇمكىن... سوندا ءبىز تىنىشتىقتى، باقۋاتتى ءومىردى اللادان تىلەسەك تە ءوز ەلىمىزدە، جەرىمىزدە قۇزىرەتتى ورىنداردان، بيلىكتەن سۇرامايمىز با ەكەن؟ ولار جاۋاپتى ەمەس پە ەكەن سوندا؟
ىندىنى تازا ەشكىم جوق،
سىرتىندا ماي، ىشىندە وق.
ءتۇپ قارىنى تولعان بوق،
جاسىرىپ ءجۇر مۇنىسىن... ءبىزدىڭ قوعام وسىنداي بولعان. سونىمەن كولىكتىڭ الاقانداي ايناسى قانشا تۇرادى؟ وليمپيادانىڭ قولاسى؟ الەم چەمپيوناتىنىڭ كۇمىسى؟ الدە التىنعا شاعامىز با؟ جوق، التىن مەن كۇمىسپەن، ءتىپتى سول قىمبات كولىكپەن تاعى باسقاسىمەن ولشەنبەيدى ەكەن ونىڭ باعاسى. ونىڭ باعاسى - ادامنىڭ ومىرىمەن ولشەنەدى ەكەن. ءيا، سولاي. مۇنى بۇگىن تاپا-تال تۇستە بىلدىك. اۆتوكولىك ايناسىنىڭ قۇنى - ءسىز بەن ءبىزدىڭ ءومىرىمىز ەكەن... مىنە، ءبىزدىڭ شىبىن جانىمىزدىڭ، ءومىرىمىزدىڭ قۇنى... نە دەيمىز؟ باقۇل بول، جەڭىمپاز، قازاقستاندىق جاس ورەن دەنيس تەن دەيمىز بە، دەيمىز... قازاعىم وعان "يماندى بولسىن" دەپ تە جاتىر. ەندى ءقايتسىن؟ ءدىنى باسقا بولسا دا ءدىلى قازاققا جاقىن، اتاعى شىقسا دا وتانىن ساتىپ، باسقا جاققا ىعىسپاعان جىگىت ەدى، قىرشىننان قيىلدى. ۇرىپ-سوعىپ كەتسەشى؟ جوق، ويتپەدى. پىشاق سۇقتى دا جانىن ءۇزدى دە جىبەردى... قازاقستان باسشىسى، ۇكىمەتى، زاڭ ساقشىلارى، سوتى بارلىعى دا قىمبات كولىكتەرىنە وتىرادى. سوندا الاقانداي ايناعا قارايدى. سوندا نەنى، كىمدى كورەدى؟ "اينا قويدىم الدىما..."