تانىمال پروديۋسەر ءارى اكتەر نۇرتاس ادامباي ومىردەن وتكەن وتاندىق اكتەر باۋىرجان ورالبەكوۆتتىڭ ومىرىنەن ەستەلىك ۆيدەو جاريالادى، دەپ جازادى Qamshy.kz اقپارات اگەنتتىگى.

ءبىرقاتار وتاندىق فيلمدەردە بوي كورسەتكەن باۋىرجان ورالبەكوۆ 17 شىلدەدەن 18 شىلدەگە قاراعان ءتۇنى قايتىس بولعان ەدى. قايعىلى حاباردى جەتكىزگەن ارىپتەس دوسى نۇرتاس ادامباي جەلىدەگى پاراقشاسى ارقىلى مارقۇمنىڭ وتباسىنا كوڭىل ايتقان بولاتىن.

«جانىمدى ايتپاي ۇعار اعام ءارى جاناشىرىم ومىردەن وزدى. بۇل قالاي بولعانى؟ الداعى ۋاقىتتا دەمالىسىمدا وزىڭە بارىپ، كەزدەسەمىن دەپ وتىرىپ، بۇگىن سەنىمەن ماڭگى قوشتاسقالى وتىرمىن.

سوڭعى كەزدەسۋدە «باقىتتىسىڭ با؟» دەپ سۇرعانىمدا «باقىتتىمىن» دەپ جاۋاپ بەرىپ ەدىڭ.

سەنى تانيتىنداردىڭ ءبارى اقكوڭىل ەكەنىڭدى جاقسى بىلەدى. وتباسىڭا كوڭىل ايتامىن»،- دەپ جازعان ەدى ادامباي.

باۋىرجان ورالبەكوۆ تىرىسىندە وتاندىق بىرنەشە فيلمگە ءتۇستى. ونىڭ ىشىندە اتاقتى "ءسابينا كەلىن" ("كەلينكا سابينا") كينوكومەدياسىندا باس قۇدانىڭ رولىندە ويناپ، كورەرمەننىڭ جۇرەگىنە جول تاپتى. ءارى اكتەر حالىققا كۆن ارقىلى تانىس.