الماتىداعى اۆتوبۋستاردىڭ سوقتىعىسۋى سالدارىنان زارداپ شەككەن جولاۋشىلاردىڭ جاعدايى تۋرالى دارىگەرلەر ايتىپ بەردى. بۇل تۋرالى Qamshy.kz اقپارات اگەنتتىگى tengrinews.kz پورتالىنا سىلتەمە جاساپ حابارلايدى. 

الماتى قالاسى دەنساۋلىق ساقتاۋ باسقارماسىنىڭ باسشىسى نۇرجان يسابەكوۆتىڭ مالىمەتىنشە، اپاتتان 21 ادام زارداپ شەككەن ەكەن، ونىڭ ۇشەۋى بالالار. 16 ادام ۇيلەرىنە قايتارىلدى، الايدا دارىگەردىڭ باقىلاۋىندا بولادى. بەس ادام اۋرۋحاناعا جاتقىزىلدى.

بەس ادامنىڭ ۇشەۋى قالالىق جەدەل-جاردەم اۋرۋحاناسىنا جەتكىزىلدى، ال ەكەۋى ورتالىق كلينيكالىق اۋرۋحانادا. ىشىنەن جاراقات العان 46 جاستاعى ەر ادامعا وتا جاسالدى.

«پاسيەنتتەردىڭ جاعدايى قالىپتى. اۋىر حالدە جەتكەن ەشكىم جوق. ەڭ كىشى پاسيەنتتىڭ جاسى – 6-دا، ال ۇلكەنى – 60-تا»، - دەدى يسابەكوۆ.

ايتا كەتەيىك، 2018 جىلدىڭ 22 شىلدەسىندە ەكى اۆتوبۋس بەتپە-بەت سوقتىعىسىپ قالعان. جول اپاتى الماتىداعى دوستىق داڭعىلىنىڭ بويى، قۇرمانعازى مەن اباي كوشەلەرىنىڭ ورتاسىندا بولدى.

«الماتىەلەكتركولىك» ج ش س باسشىسى ريزۆان تىنايەۆتىڭ ايتۋىنشا، جول اپاتى جايلى تولىق اقپارات تەرگەۋ جۇمىستارى اياقتالعان سوڭ جاريالانادى. انىقتالعان دەرەكتەرگە سايكەس، جۇرگىزۋشى قول تەجەگىشىن سالماعان. ونىڭ ۇستىنە سوقتىعىسقان اۆتوبۋستار جاڭا بولعان.