الماتى قالاسىنداعى №6 كىتاپحانادا اقىن، حالىقارالىق «الاش» ادەبي سىيلىعىنىڭ لاۋرەاتى، «قازاق ءۇنى» گازەتىنىڭ باس ديرەكتورى قازىبەك يسامەن استانانىڭ 20 جىلدىعىنا وراي كەزدەسۋ ءوتتى. اتالمىش شارانى الماتى قالاسى ىشكى ساياسات باسقارماسىنىڭ تاپسىرىسىمەن «ەل-شەجىرە» قوعامدىق قورى ۇيىمداستىردى.
ءىس-شارا بارىسىندا قازىبەك يسا استانانى كوشىرۋ جايىنداعى شەشىمنىڭ دۇرىستىعىن العا تارتتى. ويتكەنى بۇل سول ۋاقىتتاعى ءتىلىمىزدى، ءدىنىمىزدى ساقتاپ قالۋدىڭ ءبىر جولى بولعانىن ەسكە سالدى. سونداي-اق، «مەن ۇلتتىق پاتريوتيزم جولىندا قىزمەت جاساپ جۇرگەن ازاماتپىن. وسى تاقىرىپقا بايلانىستى بارلىق شەشىمدى قوس قولداپ قولدايمىن. استانانى الاتاۋدان ارقاعا اۋىستىرۋ ماڭىزدى ءارى جاۋاپكەرشىلىگى جوعارى جۇمىس ەدى. ورىستانعان ۇلتىمىزدى قازاقىلاندىرۋدى كوزدەدىك. بۇگىندە ءوز ناتيجەسىن كورسەتتى. مىنە سول 20 جىل بۇرىنعى قالاۋىمىز ورىندالىپ، ەگەمەندى ەلدىڭ ۇرپاعىنا اينالدىق. انا ءتىلىمىزدىڭ دە باعاسى كوتەرىلىپ، ءقادىرى ارتىپ كەلەدى. ءوز تىلىمىزدە سويلەيتىندەر كوبەيدى. ءتىپتى كەز-كەلگەن مەكەمەگە بارىپ قازاق تىلىندە قىزمەت كورسەتۋىن تالاپ ەتە الامىز. بۇنىڭ بارلىعى ءبىزدىڭ جەتكەن جەتىستىگىمىز دەۋگە بولادى» - دەدى.
سونىمەن قاتار، استانا بارلىق مادەني، ادەبي، عىلىمي، ساياسي مەكەمەلەردىڭ وشاعىنا اينالىپ ۇلگەرگەندىگىن تىلگە تيەك ەتتى. ارقا توسىنە تەك حالىقتى ەمەس، ۇلكەن عيماراتتار مەن باستى كورپۋستاردى ورنالاستىرعاندىعى جايىندا وي قوزعادى. اقىن «نەگىزگى جۇيە، ماڭىزدى شەشىمدەر ەلوردادا قابىلدانادى. از ۋاقىت ىشىندەگى استانانى اۋىز تولتىرىپ ايتۋعا بولادى. ال الداعى دامۋىمىز بۇدان دا قارقىندى بولارىنا كۇمانىم جوق»- دەپ جىگەرلەنە، ۇلكەن سەنىممەن سويلەدى.
كەزدەسۋگە كەلگەن ستۋدەنت جاستار استانا جايىنداعى ولەڭدەرىن وقىدى. ال سۇراققا دۇرىس جاۋاپ بەرگەندەرگە كىتاپتار سىيعا بەرىلدى.