ق ر باس پروكۋراتۋرا ادۆوكات باۋىرجان ازانوۆتىڭ ۇستىنەن ق ر قك 274 بابى بويىنشا – جالعان اقپارات تاراتقانى ءۇشىن قىلمىستىق ءىس قوزعادى.

25 شىلدەدە قازاقستانداعى ادام قۇقىقتارى جونىندەگى حالىقارالىق بيۋرونىڭ سايتىندا زاڭگەر باۋىرجان ازانوۆتىڭ ۇستىنەن قىلمىستىق ءىس قوزعالعانى تۋرالى اقپارات جەلى قولدانۋشىلارىنىڭ اراسىندا قىزۋ تالقىلاندى. كوبى زاڭگەردى جاقتاپ، ونى پىكىر بىلدىرگەنى ءۇشىن جاۋاپكەرشىلىككە تارتۋ كونستيتۋسياعا ساي ەمەس ەكەنىن جازدى. باۋىرجان ازانوۆتىڭ ارىپتەسى دجوحار وتەبەكوۆ تە ادام قۇقىقتارى جونىندەگى حالىقارالىق پاكتىدە ءار ادام پىكىر جانە ءسوز بوستاندىعىنا قۇقى بار ەكەنىن ايتادى.

- جالعان ءسوز ءۇشىن قۋدالايتىن بىردە ءبىر ەلدى بىلمەيمىن. 4 جىل بۇرىن وسى نورمانى قىلمىستىق كودەكسكە ەنگىزگەندە مەن باق-تا جانە ءوزىمنىڭ بلوگىمدا كونستيتۋسيا، دەموكراتياعا ساي كەلمەيتىنىن جانە كونستيتۋسيا بويىنشا كورسەتىلگەن ءسوز بوستاندىعى مەن بۇۇ ازاماتتىق جانە ساياسي حالىقارالىق پاكتى بويىنشا ەنگىزىلگەن پىكىر بوستاندىعىنا نۇقسان كەلتىرەتىنىن ايتقانمىن. بۇل نورما وركەنيەتتى ەلدەردىڭ قىلمىستىق زاڭىندا ەشقانداي بالاماسى جوق.  ادامدار قاتەلەسكەننىڭ وزىندە ءسوز بوستاندىعى مەن پىكىر بوستاندىعىن نەگىزگە الا وتىرىپ ونىڭ قاتەلەسە الاتىنىن ەسكەرۋ كەرەك.

ەگەر ادام ناقتى بىرەۋدىڭ ابىرويىنا نۇقسان كەلتىرسە ول ءۇشىن ارنايى جاۋاپكەرشىلىك بار. مورالدىق شىعىندى وتەۋ ءۇشىن مۇلكىن تاركىلەۋ دە كورسەتىلگەن، - دەيدى دجوحار وتەبەكوۆ.

"پەدوفيلدىڭ قۇربانى بولدى، زورلاندى" دەگەن 7 جاستاعى بالانىڭ ەكس-زاڭگەرى باۋىرجان ازانبەكتى قولداۋشىلار كوپ. ونىڭ بالاعا كومەكتەسۋ ءۇشىن تەگىن جۇمىس ىستەگەنىن جانە زاڭگەردىڭ جالعىز عانا ماقساتى - زورلاۋ ىسىنە قاتىستى بارلىق كۇدىكتىنى جاۋاپكەرشىلىككە تارتۋ بولعانىن ايتىپ، وعان اراشا سۇراپ قول دا جيناپ جاتىر.  

زاڭگەر باۋىرجان ازانوۆتى قولدايتىن مىڭعا تارتا جەلى قولدانۋشىسى ق ر پرەزيدەنتى نۇرسۇلتان نازاربايەۆقا زاڭگەرگە اراشا ءتۇسۋدى سۇراپ، حات جازدى.

باۋىرجان ازانوۆتىڭ ءوزى وتاندىق باق-قا بەرگەن سۇحباتىندا جەلىدە ونى قولداۋشىلاردىڭ كوپ ەكەنىنە قۋاناتىنىن جەتكىزگەن ەدى.

«وسى قىلمىستىق ىستە 7 جاسار بالانىڭ ىسىنە قاتىستى كۇدىكتىلەردى جاۋاپقا تارتۋدى عانا ماقسات تۇتقان جالعىز زاڭگەردى ءوز مۇمكىندىكتەرىن پايدالانىپ قۋدالاپ جاتقاندار ءوز ارەكەتى ارقىلى قازاقستان قوعامى مەن الەم الدىندا  بيلىك ورگاندارى مەن باسقارماسىنىڭ بەدەلىن ءتۇسىرىپ وتىر. زاڭگەر ازانوۆ تەرگەۋ قۇپياسىن جاريالاماي، سوت ساراپتاماسى جۇرگىزىلىپ جاتقانىن، الەۋمەتتىك جەلىدە الدەكىمدەر ونىڭ ابىرويى مەن بەدەلىنە نۇقسان كەلتىرۋ ءۇشىن شىندىققا جاناسپايتىن اقپاراتتى تاراتىپ جاتقانىن حالىققا جەتكىزدى» دەپ جازىلعان حاتتا.

ەلباسىعا اراشا سۇراپ حات جازعاندار نۇرسۇلتان نازاربايەۆتىڭ اتالمىش قىلمىستىق ىسكە قاتىستى ايتقان پىكىرىن مىسالعا الا وتىرىپ، باۋىرجان ازانوۆقا قاتىستى قىلمىستىق ءىستى تىركەگەندەر زاڭ بويىنشا جازالانۋى قاجەت ەكەنىن باسا اتاپ وتكەن.

ەستەرىڭىزگە سالا كەتەيىك، نۇرسۇلتان نازاربايەۆ 2018 جىلدىڭ 1 ماۋسىمىندا 7 جاستاعى بالاعا قاتىستى ءىس تۋرالى پىكىر بىلدىرگەن بولاتىن.

«بارلىق جەردە تۋىستار وتىرىپ العان. قىلمىستىق ىسپەن اينالىسىپ جاتقان پوليسيا – تۋىستار، جوعارى ورگانداردا وتىرعاندار – تۋىستار، ودان دا جوعارىداعىلار – ولار دا تۋىستار. وسىنىڭ بارلىعى ءىستى توقتاتۋ ءۇشىن جاسالدى. مۇندايعا جول بەرىلمەۋى كەرەك!» دەگەن ەدى نازاربايەۆ.

مىڭعا جۋىق ادام قول قويعان حاتتا جەلى قولدانۋشىلارى ازانوۆتىڭ اتالعان ىستەگى ماقساتى ايقىن بولعانىن ايتادى.

«زاڭگەر ازانوۆ قۇقىققورعاۋ ورگاندارىنان ىسكە قاتىستى جاۋاپتى ادامداردى جاۋاپكەرشىلىككە تارتۋدى عانا كوزدەدى. سول ءۇشىن قولدان كەلگەنىن جاسادى. ونى جالعان اقپارات تارتقانى ءۇشىن قىلمىستىق جاۋاپكەرشىلىككە تارتۋ – حالىق مەن حالىقارالىق قوعامداستىقتىڭ الدىندا قۇقىققورعاۋ ورگاندارى مەن باسقارمالاردىڭ بەدەلىن تۇسىرەدى، حالىقتىڭ ەلدەگى سوت جۇيەسى مەن قۇقىققورعاۋ ورگاندارىنا سەنىمسىزدىك پايدا بولۋىنا تۇرتكى بولادى.

2018 جىلدىڭ 23 مامىرىندا باۋىرجان ازانوۆقا قاتىستى ءىستى تىركەگەندەر  قاتاڭ تۇردە جازالانۋى قاجەت» دەپ جازىلعان حاتتا.  

زاڭگەردىڭ ۇستىنەن قىلمىستىق ءىس قوزعالعاندا ونىڭ ساياسي استارى بار بولۋى مۇمكىن ەكەنىن ايتقاندا دا بولدى. حالىقارالىق تاجىريبەنى نەگىزگە الا وتىرىپ، دجوحار ۋتەبەكوۆ تە زاڭگەردىڭ ۇستىنەن قىلمىستىق ءىس قوزعالۋى شەكتەن شىققاندىق دەپ ەسەپتەيدى. 

- بۇل جەردە ادامنىڭ پىكىرى ءۇشىن قۋدالاعانىن بايقاۋعا بولادى. ادامنىڭ پىكىرى قاتە بولسا دا ونى قۋدالاماۋ كەرەك. سوندىقتان، مەن بۇل ادام قۇقىعىن شەكتەيدى دەپ ويلايمىن جانە ونى قولدانباۋ كەرەك دەپ ەسەپتەيمىن.

باۋىرجاننىڭ ىسىندە ساياسي استار بار دەپ ويلايمىن. ەگەر پروكۋراتۋرا ونىڭ ارەكەتىمەن كەلىسپەسە، ول زاڭگەر ادەبىن بۇزدى دەپ ويلاسا، ادۆوكاتتار القاسىنا شاعىم ءتۇسىرۋ كەرەك ەدى، ءبىراق قىلمىستىق ءىس ەمەس» دەيدى زاڭگەر.

ەستەرىڭىزگە سالا كەتەيىك، بۇعان دەيىن قوعام قايراتكەرى ارۋجان ساين ءوزىنىڭ Facebook پاراقشاسىندا ءساۋىر ايىنىڭ باسىندا 7 جاستاعى بالانىڭ اناسى بەلگىسىز جاعدايعا بايلانىستى زاڭگەر باۋىرجان ازانوۆتىڭ قىزمەتىنەن باس تارتقانىن حابارلاعانىن جازعان بولاتىن.

«زاڭگەر باۋىرجان ازانوۆتىڭ قىزمەتىنەن باس تارتقانى تۋرالى حابار وعان پوشتا ارقىلى رەسمي تۇردە جەتكىزىلدى جانە تەرگەۋشىگە ءوتىنىش بەرىلدى. وسىدان كەيىن باۋىرجان ازانوۆ تەرگەۋ ىسىنە ارالاسپادى، بىزبەن بايلانىسقا شىقپادى. ول ءوزىنىڭ بۇرىنعى سەنىم بىلدىرۋشىسىنە نۇقسان كەلتىرەتىن اقپاراتتى جاريالاۋعا قۇقىعى جوق» دەپ جازدى ارۋجان ساين.

ول اناسىنىڭ مۇنداي شەشىمگە نەلىكتەن كەلگەنىن جازا المايتىنى جانە ءدال سول سەكىلدى  باۋىرجان ازانوۆ تا بۇرىنعى سەنىم بىلدىرۋشىسىنە قاتىستى اقپارات جاريالاۋعا قۇقىعى جوق ەكەنىن ايتادى.  

«بالانىڭ اناسى ماعان حابارلاستى. ول باۋىرجان ازانوۆتىڭ 7 جاستاعى بالانىڭ ادۆوكاتى ەمەس ەكەنىن حالىقتان جاسىرعانىنا تاڭعالعانىن ايتادى. زاڭگەر ءساۋىردىڭ باسىنان باستاپ بىردە ءبىر تەرگەۋ ىسىنە قاتىسقان جوق. ادەيى حالىقتى اداستىردى.

ءبىز ق ر باس پروكۋراتۋراسىنا وسى جاعدايعا بايلانىستى مالىمدەمە جاساۋدى سۇرايمىز. سەبەبى تەرگەۋ ءىسى جابىق رەجيمدە ءوتىپ جاتىر. سوندىقتان ءبىز اتالمىش ىسكە قاتىستى ەشقانداي تۇسىنىكتەمە بەرە المايمىز. وسى سەبەپپەن ءبىز ونىڭ 7 جاستاعى بالانىڭ ادۆوكاتى ەمەس ەكەنىن حابارلاماعان ەدىك» دەپ جازدى ارۋجان ساين.

ارىپتەستەرىن قورعاۋعا استانالىق زاڭگەرلەر تولەگەن شايكوۆ، امانجول مۇحامەدياروۆ پەن يگور ۆرانچيەۆ نيەت بىلدىرگەن بولاتىن.