قازاقستان رەسپۋبليكاسى ءبىلىم جانە عىلىم مينيسترلىگى عىلىم كوميتەتى احمەت بايتۇرسىن ۇلى اتىنداعى ءتىل ءبىلىمى ينستيتۋتى مەن حالىقارالىق «قازاق ءتىلى» قوعامىنىڭ ۇيىمداستىرۋىمەن 2018 جىلدىڭ 03 تامىزىندا الماتى قالاسىندا «ءتىل ماسەلەسى – رۋحاني جاڭعىرۋدىڭ نەگىزى» اتتى لينگۆيستيكالىق سەمينار ءوتتى.

اتالمىش سەمينارعا قحر ورتالىق ۇلتتار ۋنيۆەرسيتەتى از ساندى ۇلتتار فيلولوگياسى قازاق ءتىلى مەن ادەبيەتى فاكۋلتەتىنىڭ پروفەسسورلارى جاڭ ديڭجيڭ مەن مەي دوڭ سيا جانە دوكتورانت ۋي دي، سونداي-اق، يرانداعى اللامە تاباتابي ۋنيۆەرسيتەتىنە قاراستى تۇركولوگيا ءبولىمىنىڭ باسشىسى بەحرۋز بەكبابايى مەن ماسساچۋسەتس شتاتى كەمبريدج قالاسى گارۆارد ۋنيۆەرسيتەتىنىڭ دوكتورانتى الەكس ۋاربۋرتون قاتىستى.

قازاق تىلىندە بايانداما جاساعان شەتەلدىك عالىمدار قازاق ءتىلىن عىلىمي تۇرعىدان زەرتتەگىسى كەلەتىندەرىن ايتا كەلە، لاتىن الىپبيىنە كوشۋ – وڭتايلى شەشىم بولعاندىعىن اتاپ ءوتتى. سونىمەن بىرگە، تۇركولوگ بەحرۋز بەكبابايى ءوزى باسقارىپ وتىرعان تۇركولوگيا بولىمىندە قازاق ءتىلىن ۇيرەتۋدى ماقسات ەتىپ وتىرعانىن جەتكىزدى.

سەميناردا قازاقستاننىڭ مەملەكەتتىك تىلىندە ءتىل ءبىلىمى سالاسىنداعى وزەكتى ماسەلەلەردى قامتىپ،  لاتىن الىپبيىنە قاتىستى قۇندى بايانداما جاساعاندارى ءۇشىن  شەتەلدىك عالىمدارعا احمەت بايتۇرسىن ۇلى اتىنداعى ءتىل ءبىلىمى ينستيتۋتى مەن حالىقارالىق «قازاق ءتىلى» قوعامىنىڭ اتىنان ارنايى سەرتيفيكات پەن العىس حات تابىستالدى.

قۋانىش جۇمابەك